የቴዎድሮስ እምባ እና የክብር ካባ የለበሱት ተኩላዎች

ቴዎድሮስ የ40ዎቹ ዕድሜ አጋማሽ ላይ የሚገኝ ኑሮውን በትጋት የሚገፋ ለቤተሰቡ ደፋ ቀና የሚል ሰው ነው

የራሱ ትንሽ የንግድ ሥራ አለው የሚኖረውም በአዲስ አበባ ሰፈር ውስጥ በሚገኝ አንድ አሮጌ አፓርትመንት ውስጥ ነው። የሕይወቱ ትልቁ ህልም ልጆቹን አስተምሮ የተሻለ ኑሮ እንዲኖሩ ማገዝ ነበር። ይህ ህልሙ ግን ባልጠበቀው መንገድ፣ በክብር ካባ በለበሱ ተኩላዎች ሳይጨልም አልቀረም።

ሁሉም የጀመረው ከጥቂት ወራት በፊት ነው። ቴዎድሮስ ሥራውን ለማስፋት የውጭ ምንዛሪ ፈቃድ ለማግኘት ሲደክም ቆይቶ ነበር።

የመንግሥት መስሪያ ቤቶችን በር ሳያንኳኳ አልቀረም። ቢሮክራሲው አድካሚና ተስፋ አስቆራጭ ነበር። አንድ ቀን ግን የድሮ ጓደኛው የሆነው ታምራት ደውሎለት አንተ ሰው ምነው ጠፋህ? ችግር አለ እንዴ? አለው። ቴዎድሮስም ስለፈቃዱ ጉዳይ እና ስለሚገጥመው ውጣ ውረድ ነገረው።

ታምራትም እንዴ? ለዚህ ነው የሚጨነቁት? እኔ የማውቀው አንድ ሰው አለ። በቀጥታ ከላይ ካሉ ትልልቅ ሰዎች ጋር ይነጋገራል አይሳነውም አለው። የቴዎድሮስ ጆሮ ከፈተ። ታምራት የትም የማይቀርባቸው የሚመስሉ ከፍተኛ ባለሥልጣናት ጋር ተነስተው የሚያሳዩትን ፎቶዎች በማኅበራዊ ሚዲያ ላይ ለቴዎድሮስ ላከለት።

አንደኛው ፎቶ ላይ በቅርብ ከሚታወቅ ሚኒስትር ጋር ሲጨባበጥ ይታያል ሌላኛው ላይ ደግሞ የክልል ፕሬዚዳንት ጋር እየሳቀ። ቴዎድሮስ ትንሽ አመነታ፣ ግን የጊዜ ግፊቱና ህልሙ አሸነፈው።

በቀጠሮው መሠረት ቴዎድሮስና ታምራት በአንድ ዘመናዊ ሆቴል ተገናኙ። እዚያም አቶ ታደሰ የሚባል ወጣት የ30ዎቹ ዕድሜ አካባቢ የሚገኝ ሥርዓታማ ልብስ የለበሰና በሚያምር አነጋገር የሚያናግር ሰው አገኛቸው። ታደሰ ንግግሩን ሲጀምር እኔ እኮ እንደማንኛውም ሰው አይደለሁም የሥራ ግንኙነቴ ከላይ ከሚገኙ ትላልቅ ሰዎች ጋር ነው በማለት ነበር። ቴዎድሮስም ስለጉዳዩ ሲያስረዳ ታደሰ በፈገግታ እያዳመጠ ይህ እኮ በጣም ቀላል ጉዳይ ነው፤ በሳምንት ውስጥ ይፈጸማል አለው።

ነገር ግን ለዚህ ቀላል ጉዳይ ከፍተኛ የአገልግሎት ክፍያ እንደሚጠይቅ ገለጸ። ይህ ለባለሥልጣናቱ መያዣ ነው ያለዚህ ማንም አይሰማህም ብሎ አንድ ትልቅ የገንዘብ መጠን ጠየቀ።

ቴዎድሮስ ትንሽ ቢጠራጠርም ታደሰ ከላይ ካሉ ሰዎች ጋር የተነሳቸውን ፎቶዎች በስልኩ እያሳየ የፓለቲካ ሚስጥሮችን የሚመስሉ ታሪኮችን እየነገረና በትልልቅ ፕሮጀክቶች ውስጥ ስላለው ተሳትፎ እያወራ እምነቱን አገኘው። 

ይህ የሀገር ትልቅ ባለስልጣን ደሞዝ እንኳን የማይበቃው እዚህ የለኝም ብሎ አይመልስም በሚል ቀልድ የታገዘ የማስመሰል ንግግሩ ቴዎድሮስን ሙሉ በሙሉ አሳመነው። ልቡ ፈራ ተባ እያለ የነበረውን ትንሽ ገንዘብ ከሌላ ሰው ተበድሮ፣ ወደ 1.5 ሚሊዮን ብር የሚጠጋ ገንዘብ በሁለት ቀን ውስጥ ለታደሰ ሰጠ። ታደሰ ገንዘቡን ከተቀበለ በኋላ ስለዚህ ጉዳይ ለማንም እንዳትናገር በጣም ሚስጥራዊ ነው የባለሥልጣናቱን ስም የሚያጎድፍ ነገር ከሆነ እኛም አንተም እንጠየቃለን በማለት አስጠነቀቀው።

ሳምንት አለፈ። ፈቃዱ አልተገኘም። ቴዎድሮስ ታደሰን ሲደውልለት ስልኩ አይነሳም።ወደ ታምራት ደውሎ ሲጠይቀው ምን እንደሆነ አላውቅም እኔም እያገኘሁት አይደለም አለው። ወራት አለፉ ታደሰ ከምድር እንደጠፋ አድራሻው ጠፋ። ቴዎድሮስ እንደተታለለ ሲገባው አለቀሰ። የቤተሰቡን ህልም፣ የልጆቹን የወደፊት ተስፋ አብሮ ያጨለመበት መሰለው።

ቴዎድሮስ ወደ ፖሊስ ለመሄድ ወሰነ። የታምራትንም ሆነ የታደሰን ፎቶዎች መልዕክቶች እና የታደሰን የመኪና ሰሌዳ ቁጥር ጭምር ይዞ ሄደ። ፖሊስ ጣቢያ ሲደርስ ግን ሌላ የሚያንገበግብ ነገር ገጠመው። ታደሰ ከባለሥልጣናት ጋር ተነሳ የተባሉትን ፎቶዎችና መልዕክቶች በማስረጃነት ሲያቀርብ መርማሪው 
እነዚህን ትልልቅ ሰዎች ታውቃለህ? እነሱ የሚያደርጉትን ነገር ከነዚህ ተራ ሰዎች ጋር አትቀላቅል በሚል ንቀት መለሰለት። ቴዎድሮስ ታደሰ ስሙን ተጠቅሞ እንዴት እንዳጭበረበረ ሲያስረዳ እኛ እኮ ታደሰ የሚባል ሰው አናውቅም አንተ ማን ነህ እነሱን የምታነካካ? የሚል ዛቻ ቀረበበት። አንተ ደሞ የምትፈልገው የኛን ትልቅ ሰው ስም ማጥፋት ነው አይደል? በሚል ስጋት የተሞላ ማስጠንቀቂያም ተሰጠው።

ቴዎድሮስ ደነገጠ። የተወለደበትን ዕዳ በራሱ ላይ ጭኖ፣ አሁን ደግሞ ፍትህን በሚጠብቅበት አካል ተዛተበት። በድጋሚ የመጎዳት ፍርሃት ተሰማው። አንተ ሰው አሁን ካልተወከ ባለሥልጣናት የሚያውቁት እኛ እኮ ከላይ የተሰጠን የቤት ሥራ ነው ያመጣኸውን የውሸት ማስረጃ አቁምና ዝም በል አለበለዚያ እኛም አንተም ልንጠየቅ እንችላለን የሚል ቀዝቃዛ ማስጠንቀቂያ ቀረበለት። ቴዎድሮስ በከባድ ስሜት ተዋጠ። በልቡ የታደሰ ተባባሪ የሆኑት እነሱ እራሳቸው ናቸው ወይ? የሚል ጥያቄ ተነሳበት። ከፖሊስ ጣቢያ ለቅቆ ሲወጣ ሙሉ በሙሉ ተስፋ ቆርጦ ነበር። ገንዘቡንም እምነቱንም ከሁሉም በላይ ደግሞ ለመንግሥትና ለፍትህ አካላት የነበረውን አክብሮትና ተስፋ አጣ።

ዛሬ ቴዎድሮስ አሮጌው አፓርትመንቱ ውስጥ ብቻውን ተቀምጧል። ባለፈው ሳምንት ቤቱ ሊያዝበት እንደሆነ የሚያሳይ ወረቀት ተልኮለታል። ሚስቱ የገጠመውን ችግር ብትረዳም ለልጆቹ ትምህርት ክፍያ መክፈል አለመቻሉን ስታስብ እንባዋ አይቆም። ቴዎድሮስ የቀን ስራ በመስራት ቤተሰቡን ለማኖር ይሞክራል። ግን ሁሌም የባለሥልጣናት ስም ጋሻ ሆኖ ሲያገለግል ወንጀለኞችም በእሱ ሥር ተደብቀው መታበያ ሲያደርጉት አይኑ እንባውን ያረግፋል። ህልሙ እንደ ጭስ ተኖ ጠፋ። አሁን ያለው ብቸኛው ነገር የሰዎች እምነት እንዴት በቀላሉ እንደሚታለፍና ስማቸው በከንቱ ለወንጀል እንደሚውል የሚያሳይ ህያው ምሳሌ ነው።

ቴዎድሮስ ያጋጠመው ችግር የቅርብ ትውውቅ በማስመሰል ብቻ የሚያበቃ አይደለም። በሀገራችን ትልልቅ የንግድ ተቋማትና ድርጅቶችን ስም በመጠቀም የሚፈጸሙ የማጭበርበር ወንጀሎች እየጨመሩ ነው።

 የመንግሥት ወይም የግል ትልልቅ የፕሮጀክት ጨረታዎችን የሚቆጣጠሩ ወይም ውጤቱን የሚያውቁ አስመስለው የጨረታ ሰነድ ለማስገባት ለሚፈልጉ ድርጅቶች መረጃ በመሸጥ ወይም ጨረታ እንዲያሸንፉ በማስመሰል ገንዘብ መቀበል (Bid Rigging).

የሀገር ውስጥ ወይም የውጭ ኢንቨስትመንት ድርጅቶችን ስም በመጠቀም በአትራፊነት የተጋነኑ የሐሰት የኢንቨስትመንት ዕድሎችን በመፍጠር ከዜጎችና ከንግድ ተቋማት ገንዘብ መሰብሰብ (Ponzi Schemes)

 ትልልቅ ኩባንያዎችን ስም በመጠቀም የሐሰት የሥራ ማስታወቂያዎችን በመለጠፍ፣ የሥራ ቅጥርን ለማመቻቸት በሚል ክፍያ መቀበል (Job Scams).

ትልልቅ ኩባንያዎችን ምርቶች ለማቅረብ ወይም ግዥ ለመፈጸም በሚል የሐሰት ኮንትራቶችን በመፍጠር ገንዘብ ማጭበርበር።

እነዚህ ወንጀለኞች፣ ትልልቅ ድርጅቶችን ስም እንደ ሽፋን በመጠቀም ከኩባንያዎቹ ጋር ትውውቅ እንዳላቸው ወይም የውስጥ መረጃ እንዳላቸው በማስመሰል ይንቀሳቀሳሉ። ይህ ደግሞ በዜጎች ላይ የገንዘብ ኪሳራ ከማስከተሉም በላይ በኩባንያዎቹ ላይ መጥፎ ስም በማስከተል የንግድ ግንኙነታቸውን ያበላሻል። ቴዎድሮስ ያጋጠመው ሁኔታ የሥልጣን እና የዝና ካባ የለበሱ ወንጀለኞች እንዴት ንጹሃን ዜጎችን ህይወት እንደሚያበላሹ የሚያሳይ ልብ የሚሰብር ማስረጃ ነው።

ፌስቡክ፡ https://web.facebook.com/addisreporternews/
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter11
X፡ https://x.com/addisreporter
ስልክ ቁጥር፡ +251981866434 / +251116393393