አዲስ ሪፓርተር – የአውሮፓ ኮሚሽን ፕሬዝዳንት ኡርሱላ ፎን ደር ሌየን በዳቮስ የዓለም ኢኮኖሚ ፎረም ላይ ባደረጉት ንግግር፣ ዓለም አቀፋዊው የፖለቲካ እና የኢኮኖሚ ሥርዓት በቋሚነት እየተቀየረ መሆኑን በመጠቆም፣ አውሮፓ በዚህ አዲስ መልክዓ ምድር ውስጥ የራሷን ሉዓላዊነትና የኢኮኖሚ ነፃነት ለማረጋገጥ ወሳኝ እርምጃዎችን መውሰድ እንደጀመረች ገልጸዋል። ፕሬዝዳንቷ እ.ኤ.አ. በ1971 የተከሰተውን የዶላር ቀውስ በማስታወስ፣ የአሁኑ የጂኦፖለቲካዊ ንዝረት አውሮፓ በውጭ ኃይሎች ላይ ያላትን ጥገኝነት እንድትቀንስና በራሷ የምትቆምበትን “የአውሮፓ ነፃነት” (European Independence) እንድትገነባ ታሪካዊ አጋጣሚ ፈጥሮላታል ብለዋል።
በኢኮኖሚው ዘርፍ አውሮፓ ከገለልተኝነት ይልቅ የንግድ አጋርነትን እያጠናከረች መሆኑን የገለጹት ፕሬዝዳንቷ፣ ከላቲን አሜሪካ ሀገራት (ሜርኮሱር) ጋር የተፈረመው ስምምነትና ከሕንድ ጋር የሚደረገው ግዙፍ የንግድ ድርድር አውሮፓን ከዓለም አቀፍ የዕድገት ማዕከላት ጋር እንደሚያስተሳስራት አመልክተዋል። ከዚህ ጋር ተያይዞ የአውሮፓን የውስጥ ንግድ ለማቀላጠፍ “EU Inc” የተሰኘ አዲስ አሠራር ይፋ እንደሚደረግና ይህም ኩባንያዎች በማንኛውም የአውሮፓ ሀገር ውስጥ በ48 ሰዓታት ውስጥ በኢንተርኔት ተመዝግበው ሥራ እንዲጀምሩ በማድረግ እንደ አሜሪካና ቻይና ያሉ ግዙፍ ገበያዎችን ለመወዳደር የሚያስችል አቅም እንደሚፈጥር አስረድተዋል።
ከደኅንነትና መከላከያ አንጻር አውሮፓ እስከ 2030 ድረስ 800 ቢሊዮን ዩሮ ለመከላከያ ዘርፍ ለመመደብ ማቀዷን ፕሬዝዳንቷ ገልጸዋል። ይህ መዋዕለ ንዋይ አውሮፓ በቴክኖሎጂና በጦር መሣሪያ ምርት ራሷን እንድትችል ከማድረጉም በላይ፣ ዩክሬን በጦር ሜዳም ሆነ በድርድር ጠረጴዛ ላይ ጠንካራ ሆና እንድትቀርብ ለ2026 እና 2027 የሚውል የ90 ቢሊዮን ዩሮ የብድር ድጋፍ መመደቡን አረጋግጠዋል። ሩሲያ በዩክሬን ላይ የምታካሂደው ጥቃት አሁንም የቀጠለ በመሆኑ፣ አውሮፓ የሩሲያን የታገዱ ንብረቶች በቋሚነት በማይንቀሳቀስ ሁኔታ እንደምትይዝም አስገንዝበዋል።
በመጨረሻም ፕሬዝዳንቷ የአሜሪካው ፕሬዝዳንት ትራምፕ በግሪንላንድ እና በታሪፍ ዙሪያ ለሰነዘሩት ዛቻ ጠንከር ያለ ምላሽ ሰጥተዋል። የአሜሪካና የአውሮፓ የንግድ ስምምነት መከበር እንዳለበትና ታሪፍ መጣል በሁለቱ ወዳጅ ወገኖች መካከል “የውድቀት አዙሪት” እንደሚፈጥር አስታውቀዋል። የግሪንላንድ ሉዓላዊነት ለድርድር የማይቀርብ መሆኑን የገለጹት ፎን ደር ሌየን፣ አውሮፓ በአርክቲክ ቀጠና ያላትን የጸጥታ አቅም ለማጠናከር የራሷን የበረዶ ሰባሪ መርከቦች የመገንባትና የአርክቲክ ስትራቴጂዋን የማሻሻል ዕቅድ እንዳላት በመግለጽ ንግግራቸውን አጠቃለዋል።
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter2
X፡ https://x.com/amejuju?s=21
https://web.facebook.com/addisreporternews
ስልክ ቁጥር፡ +251981866434 / +251116393393
