አዲስ ሪፖርተር – የቀድሞው የአሜሪካ የአፍሪካ ጉዳዮች ረዳት ሚኒስትር ቲቦር ናጂ፣ በኢትዮጵያ እና በኤርትራ መካከል ዳግም ግጭት ሊቀሰቀስ ይችላል የሚለው ስጋት እጅግ አሳሳቢ መሆኑን ገለጹ። ዲፕሎማቱ ይህንን ያሉት የኢትዮጵያ የውጭ ጉዳይ ሚኒስቴር ለኤርትራ አቻው በላከው ደብዳቤ ላይ መነሻ በማድረግ በሰጡት አስተያየት ነው። እንደ ናጂ ገለጻ፣ አሜሪካ በሁሉም ዓለም አቀፍ ጉዳዮች ላይ ጣልቃ መግባት ባይጠበቅባትም፣ በሁለቱ የአፍሪካ ቀንድ ሀገራት መካከል ያለው የጦርነት ስጋት ግን የዋሽንግተንን ከፍተኛ ትኩረት የሚሻ ወቅታዊ ጉዳይ ሆኗል።
ኢትዮጵያ ለኤርትራ በላከችው ደብዳቤ በበርካታ ቁልፍ እና ስልታዊ ጉዳዮች ላይ የሁለትዮሽ ውይይት እንዲደረግ ጥሪ ማቅረቧ ይታወሳል። ቲቦር ናጂ ይህንን የውይይት ጥሪ ተገቢ መሆኑን በመጥቀስ፣ ድርድሩ ስኬታማ እንዲሆንና ወደ ዘላቂ ሰላም እንዲያመራ የከፍተኛ አመራሮች ድጋፍ እና ዓለም አቀፍ ዲፕሎማሲያዊ ክትትል እንደሚያስፈልገው አሳስበዋል። በሁለቱ ሀገራት መካከል የሚነሱ ቅሬታዎች በጠረጴዛ ዙሪያ መፈታታቸው ለቀጠናው መረጋጋት ወሳኝ መሆኑንም አመልክተዋል።
ዲፕሎማቱ በንግግራቸው “ጦርነት የማይታሰብ ነው” በማለት በሁለቱ ሀገራት መካከል ሊፈጠር የሚችል ግጭት የሚያስከትለውን አስከፊ መዘዝ አስገንዝበዋል። ቀደም ሲል በሁለቱ ሀገራት መካከል የነበረው ደም አፋሳሽ ጦርነት ያስከተለው ጠባሳ ገና ሳይሻር፣ አዲስ ግጭት ውስጥ መግባት ለሁለቱም ወገኖችም ሆነ ለምስራቅ አፍሪካ ቀጠና ትልቅ ውድመት እንደሚሆን ዲፕሎማቱ በስጋት ገልጸዋል። በመሆኑም በዲፕሎማሲያዊ መንገድ ችግሮችን መፍታት ብቸኛው አማራጭ እንደሆነ አጽንኦት ሰጥተዋል።
ይህ የቲቦር ናጂ አስተያየት የመጣው በኢትዮጵያ በኩል ለኤርትራ የቀረበው የውይይት ጥሪ በተለያዩ የፖለቲካ ተንታኞች ዘንድ ትኩረት እየሳበ ባለበት ወቅት ነው። ኢትዮጵያ በደብዳቤዋ ላይ ያነሳቻቸው ነጥቦች ዝርዝር ይፋ ባይደረግም፣ ለቀጠናዊ ትብብርና ለጋራ ተጠቃሚነት ቅድሚያ እንደምትሰጥ በተደጋጋሚ ስትገልጽ ቆይታለች። የናጂ መልዕክትም አሜሪካ በቀጠናው ያላትን ተሰሚነት ተጠቅማ የሰላም ጥረቱን እንዲታግዝ ግፊት የሚያደርግ እንደሆነ ይታመናል።
በኢትዮጵያ እና በኤርትራ መካከል ያለው ግንኙነት ወደ አዲስ ምዕራፍ እንዲሸጋገር የሚደረገው ጥረት የዓለም አቀፉን ማህበረሰብ ትኩረት ስቧል። የቲቦር ናጂ መልዕክትም የሁለቱ ሀገራት ሰላም ለዓለም አቀፉ ደህንነት ያለውን ፋይዳ የሚያሳይ ሲሆን፣ ጉዳዩ በሰላማዊ መንገድ ካልተፈታ ሊመጣ የሚችለውን አደጋ በማሳሰብ ለአሜሪካ መንግስትም ጥቆማ የሰጠበት ሆኖ ተመዝግቧል።
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter2
X፡ https://x.com/amejuju?s=21
https://web.facebook.com/addisreporternews
ስልክ ቁጥር፡ +251981866434 / +251116393393
