በአዲሱ መንግሥት የባለሥልጣናትና የካቢኔ ሹም ሽር ይካሄዳል፤ ሌብነት ዋና አጀንዳ ነው፤ ጠ.ሚ ዐቢይ «ማን ላይ እንደሚያርፍ አላውቅም እንጂ…»

አዲስ ሪፖርተር፦ “አሁን አሁን በአዲስ አበባም ሆነ በኢትዮጵያ ደረጃ በቅጽበት ገናና የሆኑ ባለሃብቶች ስማቸው ሲጠራ መስማት እንግዳ አይደለም። አንዳንዶቹ በቀጥታ ከሚታወቁ ባለሥልጣናት ጋር በዝምድናና አብሮ በመሥራት ስማቸው የሚነሳ ነው። በቅርቡ ሌብነትን አስመልክቶ ‘ማን ላይ እንደሚያርፍ አላውቅም …’ ሲሉ ጠቅላይ ሚኒስትር ዐቢይ አሕመድ የተናገሩት እዚህ ሰፈር የሚደርስ ከሆነ፣ እየተሰማ ያለው የፀረ-ሙስና ወይም በሌብነት ላይ የተከፈተው ዘመቻ የሕዝብን ትዝብትና ቁጣ ያደመጠ ውሳኔ ይሆናል” ሲሉ የአዲሱ መንግሥት ምስረታ ይህንን ከግንዛቤ የሚያስገባ እንደሚሆን ማሳያዎች መኖራቸውን ይገልጻሉ።

በመጪው መስከረም አዲስ መንግሥት የሚመሠርተው ብልጽግና ፓርቲ ከፍተኛ የካቢኔ እንዲሁም ከክልል ጀምሮ በተለያዩ ደረጃዎች ባሉ ባለሥልጣናት ላይ ሹም ሽር እንደሚያደርግ ታውቋል። አዲስ ሪፖርተር ባገኘችው መረጃ መሠረት፣ ከሹም ሽሩ ባሻገር ብወዛ ይደረጋል። በሌብነት ላይም ከቀድሞው በበለጠ እርምጃ እንደሚወሰድ ተሰምቷል። ዜናውን የሰሙ አካላትም “ሲሆን ማየት ናፍቆናል” ብለዋል።

በቅርቡ በተካሄደው ምርጫ አሸናፊ የሆነው ገዢው ብልጽግና ፓርቲ በመስከረም የሚያካሂደውን አዲስ የመንግሥት ምስረታ ተከትሎ፣ ሃያ ሁለት አባላት ያሉበትን ካቢኔ ሙሉ በሙሉ በሚባል ደረጃ ሥር ነቀል ለውጥ እንደሚያደርግ አዲስ ሪፖርተር ሰምታለች።

ረጅም ጊዜ ያገለገሉትን ጨምሮ በፓርቲው ግምገማ መሠረት ሚኒስትሮች፣ በምክትል ደረጃ ያሉ፣ ከሚኒስትር መሥሪያ ቤቶች በተጨማሪ የኮርፖሬሽን፣ ኮሚሽን እና መሰል ተቋማት ባለሥልጣናት ለውጥ እንደሚደረግባቸው አዲስ ሪፖርተር ያገኘችው መረጃ ያስረዳል። ብወዛ ሌላው የለውጡ አካል ሲሆን፣ በዚህም መሠረት ኃላፊነታቸውን የሚለቁ እንዳሉም ታውቋል።

አዲስ ሪፖርተር እንደሰማችው ከሆነ ብልጽግና በውስጡ ያለበትን የመልካም አስተዳደር ችግርና ሌብነት በተመለከተ ከፍተኛ ዝግጅት እያደረገ ነው።

በቅርቡ ከኦቢኤን (OBN) ጋር በኦሮምኛ ቋንቋ ቃለ ምልልስ ያደረጉት የኢትዮጵያ ጠቅላይ ሚኒስትር ዐቢይ አሕመድ፣ “ማን ላይ እንደሚወድቅ አይታወቅም” በማለት በሌብነት ላይ ከፍተኛና ምሕረት የሌለው እርምጃ እንደሚወሰድ በገሃድ መናገራቸው አይዘነጋም። በሚመሠረተው አዲስ መንግሥት ዋና እና ቀዳሚ ሥራ ሌብነትን የማጥፋት፣ መልካም አስተዳደርን የመረጋገጥና በዋናነት ሰላም የማስፈን ተግባራት ልዩ ትኩረት እንደሚሰጣቸው በተለያዩ መድረኮች ደጋግመው የሚያነሱት ጉዳይ እንደሆነ ይታወቃል።

በቅርቡ የመንግሥት ኮሙኒኬሽን አገልግሎት በሙስና ላይ የተወሰደውን እርምጃ አስመልክቶ ባሰራጨው ዜና “መንግሥት በሌብነትና ሕገ-ወጥ ድርጊቶች ላይ የወሰደው ቁርጠኛ እርምጃ ተጠናክሮ የሚቀጥል ነው” ብሏል።

የፋይናንስ ተቋማትና የገንዘብ ዝውውር፣ የመንግሥት አገልግሎት ሰጪና አስተዳደር፣ የቤቲንግና ፊንቴክ ቢዝነሶች፣ ሕገ-ወጥ የማዕድን ዝውውር፣ የነዳጅ አቅርቦትና ሎጂስቲክስ፣ የአፈር ማዳበሪያ ግዢ፣ የኢትዮጵያ ኤሌክትሪክ ኃይል አቅርቦት እንዲሁም የሥራና ክህሎት ሚኒስቴር መሥሪያ ቤቶች ጭምር በመሰግሰግ፣ መንግሥት ለሕዝብ ቀጣይ ለውጥና ሁለንተናዊ ብልጽግና የዘረጋውን ምቹ ሁኔታ በመጠቀም विभिन्न ወንጀሎችን የፈጸሙ አካላት አሁን ላይ የጨለማ ሥራቸው ተገልጦ በሕግ ቁጥጥር ሥር እንዲውሉ መደረጉ የቀጣዩ ዘመቻ ማሳያ እንደሆነ መረጃውን ያጋሩን አመልክተዋል።

ከዚህ በተጨማሪም መንግሥት ሙስና፣ ስርቆትና ብልሹ አሠራሮችን በዘላቂነት ለመፍታት ከዚህ ጎን ለጎን ዘመናዊ አሠራሮችን በመዘርጋትና በዲሲፕሊን የታነጸ አመራር ለመገንባት ቁርጠኛ እንቅስቃሴ እያደረገ ሲሆን፣ ይህን ብልሹ አሠራር በሚፈጽሙ አካላት ላይ የሚወሰደው እርምጃ ተጠናክሮ እንደሚቀጥል በተለያዩ የመንግሥት መገናኛ ብዙኃን በስፋት እየተገለጸ ይገኛል።

በከፍተኛ ምስጢር እየተሠራ ያለው ልዩ ኦፕሬሽን በቅርቡ ይፋ እንደሆነው ሁሉ፣ “ማን ላይ እንደሚያርፍ አይታወቅም” በማለት ጠቅላይ ሚኒስትሩ የተናገሩለት ኦፕሬሽን ውጤት የሚጠበቅ ሆኗል።

ጠቅላይ ሚኒስትር ዐቢይ ሙስና እና ሌብነት የሀገርን የኢኮኖሚ መሰረት የሚሸረሽሩ፣ የህዝብን አመኔታ የሚያጠፉ እና የመንግስትን ህልውና አደጋ ላይ የሚጥሉ ከባድ ፈተናዎች መሆናቸውን ሲገልጹ፣ በስልጣን አላግባብ በመጠቀም ህገ-ወጥ ሀብት የሚያካብቱ አካላትን የሞራል እና የስነ-ምግባር ውድቀት በተመለከተ “በሌብነት የተገኘን ገንዘብ ወደ ቤት ወስዶ ቤተሰብን መመገብ መርዝ እንደመመገብ ነው” ሲሉ ጠንካራ ማስጠንቀቂያ መስጠታቸው አይዘነጋም።

በፍትህ እና ህግ አስከባሪ ተቋማት ማለትም በፍርድ ቤቶች፣ በፖሊስ፣ በዓቃቤ ህግ እና ኦዲተሮች አካባቢ የሚፈጸመው ስር የሰደደ ሌብነት የህዝብን እምነት የሚያጣ በመሆኑ፣ እነዚህ ተቋማት በአስቸኳይ ከሙስና ጸድተው የፍትህ ማስፈጸሚያ መሆን እንዳለባቸው ጠቁመው ነበር።

ሰሞኑን በሰጡት ቃለ ምልልስ ላይ “ትሰበስባላችሁ እንጂ አትበሉትም” በማለት ጠንካራ ማሳሰቢያ የሰጡትን ጠቅላይ ሚኒስትር ዐቢይ ንግግር ተከትሎ፣ “ተግባር ናፈቀን” በማለት ከተለያዩ አቅጣጫዎች ሕዝቡ አስተያየት እየሰጠ ይገኛል። የፍትሕ ተቋማትና ራሳቸውን ለሕዝብ የሚያስገዙ ባለሥልጣናትም እንዲያግዟቸው አሳስበዋል።

በኢትዮጵያ ሌብነት የሚፈጸመው በተዋረድ ባሉ ትስስሮች ባለሥልጣናትን በመጠቀም እንደሆነ የአደባባይ ምስጢር መሆኑን የሚጠቁሙ አካላት “መንግሥት ከሥር ሳይሆን በዋናነት ከላይ ጀምሮ እርምጃ በመውሰድ ቁርጠኝነቱን ሊያሳይ ይገባል” ይላሉ።

የባለሥልጣናት የሀብት ምዝገባ መጠናቀቁን የሚናገሩ የፀረ-ሙስና ኮሚሽን ምንጭ፦ “የአንዳንድ ባለሥልጣናት ወንድሞችና እህቶች፣ የቅርብ ቤተሰቦችና ወዳጆች በገሃድ ሚሊየነር ሆነው ያለ ሥጋት ይኖራሉ። ጠቅላይ ሚኒስትሩ ከጨከኑ እዚህ ድረስ ይሂዱና ያሳዩን፤ የፍትሕ ሥርዓቱም ያግዛቸው” ብለዋል።

ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter2
X፡ https://x.com/amejuju?s=21
https://web.facebook.com/addm