አዲስ ሪፖርተር ፕሬዝዳንት ኢማኑኤል ማክሮን ባልተለመደ መልኩ ጥቁር መነፀር አድርገው ዶቨስ እየተካሄደ ባለው የዓለም ኢኮኖሚ ፎረም መድረክ ላይ ንግግር ያደረጉ ሲሆነ ንግግራቸውን የጀመሩት ዓለም በአሁኑ ወቅት ያለችበትን የደኅንነት እና የኢኮኖሚ ቀውስ በማብራራት ነው።
በፈረንጆች አቆጣጠር በ2024 ከ60 በላይ ጦርነቶች መመዝገባቸውንና ግጭቶች እንደ መደበኛ ክስተት መታየት መጀመራቸውን የጠቀሱት ፕሬዝዳንቱ፣ ዓለም አቀፍ ሕግጋት እየተጣሱ የጉልበተኞች የበላይነት እየሰፈነ መምጣቱን አስረድተዋል። በተለይም የሩሲያ የዩክሬን ወረራ፣ በመካከለኛው ምስራቅና በአፍሪካ ያሉ ግጭቶች የባለብዙ ወገን ዲፕሎማሲ (Multilateralism) መዳከሙን እንደሚያሳዩ ገልጸው፣ ይህን ለመቀልበስ አውሮፓ በሌሎች ላይ ያለባትን ጥገኝነት ቀንሳ የራሷን ሉዓላዊነት ማረጋገጥ እንዳለባት አሳስበዋል።
በኢኮኖሚው ረገድ ማክሮን በአሜሪካ እና በቻይና መካከል ያለውን የንግድ ጦርነት በዝርዝር ተንትነዋል። አሜሪካ የአውሮፓን ጥቅም የሚጎዱ የንግድ ስምምነቶችንና ተቀባይነት የሌላቸውን ታሪፎች እንደምትጠቀም፣ በሌላ በኩል ደግሞ ቻይና ከመጠን በላይ ምርቶችን ወደ ውጭ በመላክ ገበያውን እያዛባች መሆኑን ወቅሰዋል። “አውሮፓውያን እስካሁን የዋህ ነበሩ” ያሉት ፕሬዝዳንቱ፣ ሌሎች ሀገራት ገበያቸውን ሲጠብቁ አውሮፓ ብቻ ገበያዋን ክፍት ማድረጓ ለኢንዱስትሪዎቿ አደጋ መሆኑን ጠቁመዋል። በመሆኑም አውሮፓ የራሷን ኩባንያዎች የምታስቀድምበትን “European Preference” የተሰኘ መርህ ተግባራዊ ማድረግና የንግድ መከላከያ መሣሪያዎቿን ማጠናከር እንዳለባት ገልጸዋል።
ፕሬዝዳንቱ የአውሮፓን ተወዳዳሪነት ለማሳደግ በሦስት ዋና ዋና ምሰሶዎች ላይ ያተኮረ ስትራቴጂ አቅርበዋል። እነዚህም ጥበቃ (Protection)፣ አሠራርን ማቅለል (Simplification) እና ኢንቨስትመንት (Investment) ናቸው። በአሜሪካ እና በአውሮፓ መካከል ያለው የኢኮኖሚ ዕድገት ልዩነት 70 በመቶው የሚመነጨው በፈጠራ (Innovation) ረገድ ካለው ልዩነት መሆኑን ጠቅሰው፣ አውሮፓ በአርቴፊሻል ኢንተለጀንስ (AI)፣ በኳንተም ኮምፒውቲንግ እና በንጹሕ ኢነርጂ ላይ በቢሊዮን የሚቆጠር ዩሮ መዋዕለ ንዋይ ማፍሰስ እንዳለባት አሳስበዋል። እንዲሁም የአውሮፓውያን ቁጠባ ወደ ውጭ ሀገራት ከሚፈስ ይልቅ በአውሮፓ የካፒታል ገበያ ውስጥ ኢንቨስት የሚደረግበት ሥርዓት መዘርጋት እንዳለበት አሳስበዋል።
በመጨረሻም፣ ፈረንሳይ የዘንድሮውን የG7 ሊቀመንበርነት ስትረከብ ዋና ዓላማዋ የዓለምን የኢኮኖሚ መዛባት ማስተካከል እንደሚሆን ገልጸዋል። የአሜሪካ ከመጠን በላይ ፍጆታ፣ የቻይና አነስተኛ ፍጆታና ከመጠን በላይ ኢንቨስትመንት፣ እንዲሁም የአውሮፓ አነስተኛ ኢንቨስትመንት ለዓለም ኢኮኖሚ መቃወስ ምክንያቶች መሆናቸውን በመጠቆም፣ እነዚህን ችግሮች በውይይትና በትብብር ለመፍታት ፈረንሳይ ዝግጁ መሆኗን አረጋግጠዋል። ማክሮን ንግግራቸውን ሲያጠቃልሉም፣ አውሮፓ ዘገምተኛ ብትሆንም አሁንም የሕግ የበላይነት የሚከበርባትና ለባለሀብቶች አስተማማኝ ቦታ መሆኗን በመግለጽ፣ “ከጉልበተኞች ይልቅ መከባበርን፣ ከሴራ ይልቅ ሳይንስን እንመርጣለን” በማለት ለዓለም መሪዎች ጥሪያቸውን አስተላልፈዋል።
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter2
X፡ https://x.com/amejuju?s=21
https://web.facebook.com/addisreporternews
ስልክ ቁጥር፡ +251981866434 / +251116393393
