” እንኳን እኛ ግመሎቻችንም የኢትዮጵያን ዳር ድንበር ያውቁታል !! ” አፋሮች
የኢትዮጵያን የታሪክ ድርሳናት ስንገልጥ፣ ከታላላቅ የጥንት ስልጣኔዎች ጀርባ አንድ ጠንካራ ህዝብ እናገኛለን። ይህ ህዝብ በሞቃታማው የአፋር በረሃ ውስጥ ቆሞ፣ የኢትዮጵያን ምስራቃዊ ቀጠና ሳይደፈር ለዘመናት የጠበቀውና ለሀገር ዳር ድንበር መከበር ደሙን የገበረው የአፋር ህዝብ ነው። አፋር ለኢትዮጵያ በረሃማ ክፍል ብቻ ሳይሆን፣ የሀገር መተንፈሻ ለሆነው የቀይ ባህር መግቢያና መውጫ ቁልፍ ቀጠና ነው።
ኢትዮጵያ በቀይ ባህር በኩል ከዓለም ጋር የምትገናኝበት ዋናው መስመር በአፋር መሬት በኩል ሲሆን ከጥንቱ የአክሱም ዘመን አፋሮች ጀምሮ እስከ ዛሬ ድረስ የባህር በር ጠባቂዎች እና ከባህር ወደ መሀል ሀገር የሚገቡ የንግድ ቁሶችን (የዝሆን ጥርስ፣ ወርቅና ቅመማቅመሞች) ከዝርፊያና ከባዕድ ወራሪዎች በመጠበቅ ረገድ የማይተካ ሚና ነበራቸው።
የውጭ ኃይሎች ኢትዮጵያን ከባህር በር ለማስወጣትና ለማዳከም በሚሞክሩበት ወቅት፣ አፋር የመጀመሪያው ግምባር ጠባቂ ነበር።
የአውሳና የሌሎች የአፋር ሱልጣኔቶች ለኢትዮጵያ አንድነት የነበራቸው አቋም ጽኑ ነበር። ወራሪዎች በምስራቅ በኩል ሰርገው ለመግባት ሲሞክሩ፣ የአፋር ተዋጊዎች “መሬቴ የኢትዮጵያ በር ናት” በሚል ጽኑ እምነት የሞት ሽረት ትግል አድርገዋል።
በነዛ አስቸጋሪ ዘመናት፣ ወደቦች ለጠላት ሲወድቁ እንኳ፣ አፋሮች የንግድ መስመሮችን በበረሃው ስልታቸው በመዝጋትና ጠላትን በማዳከም የኢትዮጵያ ጥቅሞች እንዳይነኩ አድርገዋል።
ኢትዮጵያ በዘመናዊው ታሪኳ የቀይ ባህር የወደብ አገልግሎት ተጠቃሚ በነበረችባቸው ዓመታት (በተለይ በአሰብና በምጽዋ ወደቦች ወቅት)፣ የአፋር ህዝብ የኢትዮጵያ ኢኮኖሚ የጀርባ አጥንት ሆኖ አገልግሏል።
አሰብ ወደብ የኢትዮጵያ ዋነኛ መተንፈሻ በነበረበት ጊዜ፣ በአፋር በረሃ የሚገኙት እነዚህ ጀግኖች የወደብ ንብረቱ ያለ ምንም ስጋት እንዲጓጓዝ ሌሊት ከቀን በታማኝነት ጠብቀዋል።
የአፋር ህዝብ ባህልና እሴት ለሀገር ንብረት ትልቅ ክብር ይሰጣል። በሚሊዮን የሚቆጠር የሀገር ሀብት በረሃውን አቋርጦ ሲያልፍ፣ አፋሮች ከጥበቃ ባለፈ እንደ ባለቤት ሆነው ንብረቱን ተንከባክበዋል።
ዛሬም ቢሆን ኢትዮጵያ ከአለም ጋር የምትተነፍስበት እና ከ95% በላይ የሚሆነው የሀገሪቱ የወጪና ገቢ ንግድ በሚከናወንበት የኢትዮ-ጅቡቲ የንግድ መስመር ኮሪደር፣ ከ ጋላፊ እስከ አዋሽ ድረስ ረጅሙን መንገድ የሚያቋርጠው በዚሁ በአፋር ክልል መሬት ላይ ነው።
አፋር ለኢትዮጵያ መሬት ብቻ ሳይሆን፣ የሀገሪቱ የኢኮኖሚ ህልውና የተመሰረተበት የማይናወጥ ዋልታ እና ምሰሶ ነው።
የአፋር ህዝብ ለኢትዮጵያ ዳር ድንበር የከፈለው መስዋዕትነት ከገንዘብና ከጥቅም በላይ ነው። ከ45°C በላይ በሆነ ሙቀት ውስጥ ቆሞ፣ ውሃ በሌለበት ምድረ በዳ የሀገርን ድንበር መጠበቅ ትልቅ ጀግንነት ነው።
አፋር ይህንን መከራ የቻለው ለሀገሩ ካለው ጥልቅ ፍቅር የተነሳ ነው። በታሪክ አጋጣሚዎች ሁሉ፣ የአፋር ህዝብ ለኢትዮጵያ ሉዓላዊነት አንድም ቀን ድርድር አድርጎ አያውቅም።
ዛሬም ቢሆን አፋር የኢትዮጵያ የልማትና የሰላም በር ነው። የጥንቱ የአዱሊስ፣ የመካከለኛው ዘመን የአውሳ፣ እና የቅርቡ የአሰብ ታሪክ የሚያስተምረን አንድ ነገር አለ፦ አፋር ለኢትዮጵያ ምስራቃዊ ድንበር የማይበገር የብረት አጥር ሲሆን የአፋር ህዝብ ለሀገሩ የከፈለው መስዋዕትነት፣ የኢትዮጵያ ህልውና መሰረት ነው።
በአሚር መሀመድ
አፋር ብዙሀን መገናኛ ድርጅት
ፌስቡክ፡ https://web.facebook.com/addisreporternews/
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter2
X፡ https://x.com/addisreporter
ስልክ ቁጥር፡ +251981866434 / +251116393393
