ኮሚሽነር ምትኩ ካሳ፣ ባለቤታቸውና ልጃቸው በተከሰሱበበት የስርቆት ወንጀል ጥፋተኛ ተባሉ

አዲስ ሪፖርተር – ጥቅምት 25፣ 2018 የአደጋ ስራ አመራር ኮሚሽን የቀድሞ ኮሚሽነር ምትኩ ካሳ፣ ባለቤታቸው እና ልጃቸው በተከሰሱበበት ከባድ የሙስና ወንጀል ጥፋተኛ ተብለዋል፡፡ የጥፍተኝነት ውሳኔውን ያሳለፈው የፌደራል ከፍተኛ ፍርድ ቤት ልደታ ምድብ 5ኛ የሙስና ጉዳዮች ችሎት ነው።

ዜናውን የዘገቡ የመንግስት ሚዲያዎች እንዳሉት የፍትህ ሚኒስቴር የሙስና ጉዳዮች ዳይሬክቶሬት ዐቃቤ ሕግ ባቀረበው ክስ በአደጋ ስጋት ስራ አመራር ኮሚሽን የተረጂዎችን ቁጥር በማጋነን የተለያዩ የእርዳታ ዓይነቶችን ከመጋዘን ወጪ በማድረግ ለተረጂዎች ሳይደርስ ተሽጦ ለግል ጥቅም እንዲውል በማድረጋቸው ነው።

በዚህም የሙስና ወንጀልን ለመደንገግ የወጣውን አዋጅ ቁ.881/2007 አንቀጽ 9 ንዑስ ቁጥር 3 የወንጀል ህግ አንቀጽ 32 (1) ሀ እንዲሁም 33 እና በህገወጥ መንገድ የተገኘ ገንዘብን ወይም ንብረትን ምንጩን ደብቆ ህጋዊ አስመስሎ ማቅረብ ወንጀል ክስ በነሐሴ ወር 2014 ዓ.ም ተመስርቶባቸው ነበር፡፡

ተከሳሾቹ አቶ ምትኩ ካሳ፣ ባለቤታቸው ወ/ሮ ሶፊያ ጀማል፣ ልጆቻቸው ወ/ሮ ሚልካ ምትኩ እና እያሱ ምትኩ፣ አቶ ዮሀንስ በላይ እና ወ/ሮ ህይወት ከበደ ናቸው፡፡

በክሱ ዝርዝር ላይ እንደተመላከተው፤ አቶ ምትኩ ካሳ ኤልሻዳይ ሪሊፍ ኤንድ ዴቭሎፕመንት አሶሴሸን ዳይሬክተር የማነ ወ/ማሪያም እና ከሌሎችም ሰራተኞች ጋር ያልተገባ የጥቅም ግንኙነት በመፍጠር በሺዎች በሚቆጠሩ ተረጂዎች ስም እንዲሁም የተረጂዎችን ቁጥር በማጋነን ለበርካታ ጊዜ የምግብ ቁሳቁሶች ከኮሚሽኑ መጋዘን በማውጣት ለተረጂዎች ሳይደርስ ለዱቄት ፋብሪካዎችና ለሌሎች ግለሰቦች በመሸጥ ህገወጥ ጥቅም ሲያገኙ እንደነበር እና ለዚህም ስራ አቶ ምትኩ ካሳ በቤተሰቦቻቸው ስም ከኤልሻዳይ ድርጅት በተለያዩ ጊዜ ተፈጽሟል።

በዚህም በአማራ፣ አፋር፣ ኦሮሚያ፣ ደቡብ ክልል (የቀድሞ) ክልሎች ውስጥ በሚገኙ የግብረሰናይ ድርጅቱ ማዕከላት የተረጂዎችን ቁጥር በማጋነን ምግብና ምግብ ነክ ያልሆኑ ቁሳቁሶችን ከኮሚሽኑ በመውሰድ ለተረጂዎች ሳያደርስ በመሸጥ ለግል ጥቅም ማዋል፣ ብድርና ድጋፍ በሚል ሰበብ በህገ ወጥ መንገድ ከኮሚሽኑ በ100 ሚሊየን የሚገመት ለእርዳታ ድርጅቱ በገንዘብ መልክ መሰጠቱ በክሱ ተመላክቷል።

በተለይም 601 ሺህ 668 ኩንታል ስንዴ፣ 41 ሺህ 789 ኩንታል በቆሎ፣ ከ78 ሺህ 386 ሊትር በላይ ዘይት፣ 3 ሺህ 999 ኩንታል ሩዝ ከተራድኦ ድርጅቱና የብሔራዊ አደጋ ስጋት ስራ አመራር ኮሚሽን ጋር በመመሳጠር እርዳታውን አዳማ ለሚገኝ የዱቄት ፋብሪካ መሸጡ ተጠቅሷል።

በሁለተኛ ክስ ደግሞ 472 ሚሊየን 886 ሺህ 304 ብር ከ32 ሳንቲም በድጋፍ መልክ በ1ኛ ተከሳሽ ፈቃጅነት በ2ኛ ተከሳሽ አማካኝነት ክፍያ እንደተፈጸመና በ3ኛ ተከሳሽ ወጪ አድራጊነት ለግል ጥቅም በመዋሉ በመንግስት ከፍተኛ ኪሳራ የደረሰ መሆኑ ተገልጿል።

የአቶ ምትኩ ልጆች እና ባለቤታቸውን በተመለከተ ደግሞ በስማቸው ተገዝተው የተገኙ ተሽከርካሪዎች እና መኖሪያ ቤቶች መኖራቸው በክሱ የተጠቀሰ ሲሆን በህገወጥ መንገድ የተገኘ ገንዘብን ወይም ንብረትን ህጋዊ አስመስሎ ማቅረብ በሌሎችም ተከሳሾች ላይ በየደረጃው የወንጀል ተሳትፏቸው በክሱ ተዘርዝሮ ተካቷል።

ክሱ ከደረሳቸው በኋላ በክሱ ላይ የተጠቀሰውን የወንጀል ድርጊት አለመፈጸማቸውን ጠቅሰው የዕምነት ክህደት ቃላቸውን መስጠታቸውን ተከትሎ ዐቃቤ ሕግ የሰው ምስክርና የሰነድ ማስረጃ አቅርቧል። የግራ ቀኙን ክርክር ያደመጠው ችሎቱ አቶ ምትኩ ካሳ እና ባለቤታቸው ወ/ሮ ሶፊያ ጀማል፣ አቶ ምትኩ ልጅ ወ/ሮ ሚልካ ምትኩን ጥፋተኛ ብሏቸዋል።