“ቢቢሲ የሴቶች መደፈርን አስመክቶ የሰራው ዘገባ ለፖለቲካ ፍጆታ ነው፤ ጠይቆ መረጃ የከለከለው አካል የለም ” ጉዳዩ የሚመከታቸው ተቋማት

አዲስ ሪፖርተር – ተቀማጭነታቸውን ናይሮቢ ያደረጉና የሚታወቁ የቢቢሲ ተቀጣሪ ሪፖርተሮች በአማራ ክልል አስገድዶ መድፈር መፈጸሙን ጠቅሰው ባሰራጩት ዜና ላይ የከልሉን የሚመከታቸውን ኃላፊዎች ለማግኘት ሞክረው ፈቃድ እንዳላገኙ ጠቅሰው የጻፉት ዜናውን ላሰቡት ዓላማ ለማመቻቸት ካላቸው የተለመደ ፍላጎት እንጂ፣ “ቢቢሲ ጠይቆ የተከለከለው ምንም ዓይነት መረጃ የለም” ሲል ጉዳዩ የሚመከተው የሴቶችና ማኅበራዊ ጉዳይ ሚኒስቴር ለአዲ ሪፖርተር አስታወቀ።  

ቢቢሲ ግጭት ባሉባቸው አከባቢዎች ሴቶች ላይ ስለተፈጸመ ጥቃት ባሰራጨው ዜና ላይ መረጃ ፈልጎ በአካልም ሆነ በስልክ ያነጋገረው የተቋሙ ባለሞያ እንደሌለና ምንም አይነት መረጃ ጠይቆ ጣቢያው አለመከልከሉን የሴቶችና ማኅበራዊ ጉዳይ ሚኒስቴር ለአዲስ ሪፖርተር አመልክቷል። ሚኒስቴሩ እንዳለው ቢቢሲ ዓላማው የአገርን ገጽ ማበላሸትና ሚዛን በጎደለው ዘገባ የአገር መከላከያ ሰራዊትን በጅምላ ስም ማጠልሸት ነው።

“የመደፈር ጥቃቶች በግጭቱ እየተሳተፉ ባሉት በሁለቱም ተፋላሚ ኃይሎች እየተፈፀሙ ቢሆንም የጤና ባለሙያዎች ከፋኖ ታጣቂዎች በበለጠ የመንግሥት ወታደሮችን ማየታቸውን ተናግረዋል” ሲል ስማቸውን ያልጠቀሳቸውን የጤና ባለሙያዎች እማኝ አድርጎ የዘገበው ቢቢሲ፣ አክሎም ስማቸው እንዳይጠቀስ የፈለጉ እና ለመረጃ ቅርብ የሆኑ አንድ የመንግሥት ሠራተኛም ከፋኖ ጋር የተያያዙ ጥቃቶች “ውስን” መሆናቸውን የጤና ባለሙያዎችን ሀሳብ በማጠናከር ገልፀዋል” ሲል ላሰፈረው ምላሽ ሲሰጡ “መረጃ ቃል በቃል ውሽት ነው ብለዋል” ይህንንም በማስረጃ አብራርተዋል። 

አንዳንድ መሰናክሎች ቢኖሩም ከፍትህ ሚኒስቴር ጋር በመሆን ግጭቶች ባሉባቸው አከባቢዎች የደረሰ ጥቃት ለማወቅ የጥናትና ምርመራ ስራዎች እየተሰሩ መሆናቸውን የሴቶችና ማሕበራዊ ሚኒስቴር አስታውቋል። የጥናትና ምርመራው ውጤት ለጊዜው ባለመጠናቀቁ ይፋ አልሆነም። እውነታው ይህ ሆኖ ሳለ በምናብ በተፈጠሩ ባለሙያዎችና ሰዎች አንድ ወገንን ለይቶ የቀረበ ዘገባ ከተራ ስም ማጥፋት የዘለለና ምንም ትርጉም ሊሰጠው እንደማይችል አመልክተዋል። 

ቢቢሲ ያሰራጨው መረጃ ለፖለቲካ ፍጆታ ለማዋል ታስቦበትና ሆን ተብሎ የሀገርን ገፅታ ለማበላሸት የተደረገ መሆኑን ያመለክቱት በሚኒስቴር መስሪያ ቤቱ የሴቶች መብት ጥበቃና ምላሽ መሪ ስራ አስፈጻሚ የሆኑት አቶ ዘካርያስ ደሳለኝ፣  የሀገርን ዳር ድንበር እየጠበቀ ያለ ወታደር በጅምላ ኬንያ ሆኖ መፈረጅ ከቶውንም ተቀባይነት እንደማይኖረው አመልክተዋል። ከላይ በተገለጸው አግባብ ተጣርቶ አጥፊዎች ላይ እገሌ ከገሌ ሳይባል እርምጃ እንዲወሰድ ስራቸውን እንደሚሰሩም አመልክተዋል።  

“ቢቢሲ አማርኛ ግጭት ባሉባቸው አከባቢዎች ሴቶች ላይ የሚፈፀም ጾታዊ ጥቃትን በተመለከተ መረጃ ለመውሰድ በክልሉ በአካልም ሆነ በስልክም ያነጋገረው የተቋሙ ባለሞያ እንደሌለና ምንም አይነት መረጃ ጠይቆ ጣቢያው አለመከልከሉን የሴቶችና ማኅበራዊ ጉዳይ ሚኒስቴር ለአዲስ ሪፖርተር ሲያስታውቅ፣ ለውደፊቱ ቢቢሲ በማንኛውም ሰዓት በአካልም ሆነ በስልክ መረጃ ቢጠይቅ እንደማይከለከል አመልክተዋል። አያይዘውም   

ቢቢሲ የተቋሙ ሰራተኛ የሆነን የትኛውንም አካል ሳያነጋግር መረጃ ጠይቆ መከልኩን መዘገቢንና ያሰራጨው መረጃ ቃል በቃል ውሽት ነው ብለዋል።  

“አብዛኞቹ የአስገድዶ መድፈር ጥቃቶች መከላከያ ሠራዊት ካምፕ በመሠረተባቸው እና በሚቆጣጠራቸው ከተሞች አካባቢ የተፈፀሙ ቢሆንም፤ ባለሙያዎች የከተማ ነዋሪዎች የተሻለ ግንዛቤ እና የጤና አገልግሎት ስለሚያገኙ ጥቃቶችን ሪፖርት የማድረግ አዝማሚያቸው ከፍ ያለ ነው ይላሉ” ያለው ቢቢሲ “በፋኖ ኃይሎች የጥቃት ሰለባ የሆኑ ተጎጂዎችን ተዋጊዎቹ በሚንቀሳቀሱበት አካባቢ ባለው ገደብ ምክንያት ማግኘት አልቻልንም” ይላል። 

ይህንን የቢቢሲ ዘገባ እርስ በራሱ የሚጣላ እንደህነ ያመለከቱ የክልሉ ባለስልጣን፣ የአገር መከላከያ ጉዳት አደረሰባቸው የተባሉትንና ስማቸው ያልተጠቀሱ የጤና ባለሙያዎችን ለማግኘትና ለማነጋገር ያልተቸገሩት የቢቢሲ የናይሮቢ ሪፖርተሮች፣ ፋኖ የደፈራቸውን እንህቶች ለማነጋገር ያልቻሉበትን ምክንያት “ ባለው ገደብ ምክንያት ማግኘት አልቻልንም” ማለቱ በራሱ ለቅጥፈቱ ማስረጃ እንደሆነ ይናገራሉ።

“ፋኖ የሚከፍተውና የሚዘጋው የቴሌኮም አገልግሎት በሌለበት ሁኔታ የፋኖ ገደብ ተጎጂዎችን ለማግኘት አላስቻለነም ማለት የቅጥፈት ማሳያ ነው” ያሉት ባለስልጣኑ፣ በሴት እህቶቻችን ላይ የደረሰ ጉዳት ለፖለቲካ ፍላጎት ለማዋል ሳይሆን ከኛ ፍትህ አንጻር በትክክል እንደሚመረመር፣ ይህም እየተደረገ መሆኑን አስታውቀዋል። 

ጾታን መሰረት ያደረጉ ጥቃቶች ጋር በተገናኘ መረጃ የመሰጠት ኃላፊነት የራሳቸው መሆኑን ያነሱት መሪ ስራ አስፈጻሚው ጣቢያው ማንን ጠይቆ እንደተከለከለ በመግለጹ መገረማቸውን ጠቅሰዋል። አክለውም ቢቢሲ በጥቅሉ መረጃ ማጣቱን ወይም መረጃ ለማኘት ሞክሮ መከለከሉን ሲያስታውቅ እያንዳንዱን ኃላፊዎች በግልጽ ቢያስታውቅ ትንሽ ወደ እውነት ይቀርብ ነበር ብለዋል። 

“ቢቢሲ ጉዳዩ ከሚመለከታቸው የአማራ ክልል ከፍተኛ የሥራ ኃላፊዎች ዝርዝር መረጃ ለማግኘት ያደረገው ተደጋጋሚ ጥረት አልተሳካም። የአማራ ፋኖ በጎጃም ምክትል ሰብሳቢ እና የፖለቲካ ጉዳዮች ኃላፊ የሆኑት አቶ አስረስ ማረ ለቢቢሲ ተዋጊዎቻቸው የአስገድዶ መድፈር ጥቃቶች ስለመፈፀማቸው እውቅና እንደሌላቸው እና የቀረበባቸው ክስም እንደሌለ ተናግረዋል” ማለታቸውን ዜናውን ለማመጣጠን የተደረገ ስልት እንደሆነም ተመልክቷል። የክልሉ ከፍተኛ ኃላፊ ዜናው “ሆን ተብሎ ግርታ በመፍጠር ሕዝብን ለማሸበር የተሴረ ሴራ ነው” ብለውታል።     

“በአማራ ክልል ጾታን መሰረት ያደረገ ጥቃት ይበራከት አይበራከት በየትኛው ሕጋዊ በሆነ አካል የተደረገ ጥናት የለም ነው” ያሉት  አቶ ዘካርያስ ደሳለኝ፣ የቢቢሲ መረጃ የአንድ ሰው፣ ቡድን ወይም ድርጅት ወኪሎች ፈጠራ ወይም ልቦለድ በመሆኑ ምንም ዓይነት ዝርዝር ምላሽ ከመስጠት እንደሚቆጠቡ ተናግረዋል።

ቢቢሲ በተደጋጋሚ የኢትዮጵያዊያንን እና የኢትዮጵያን ገፅታ ለማበላሸት መሰል ሀሰተኛ መረጃዎችን ማሰራጨት ስራ የተለመደ መሆኑን አንስተዋል። ቢቢሲ በህልውና ዘመቻው ወቅት በግልጽ ኢትዮጵያ ላይ በራሷ አገር ልጆች በክፍያ በተለያዩ ቋንቋዎችን የፈጠራና ሙያዊ ግዴታን የሳቱ መረጃዎችን በመናበብ ሲያሰራጭ እንደነነበር፣ ይህንኑ ድርጊቱን አሁንም እየሰራበት ስለመሆኑ ሰሞኑን በተደጋጋሚ በሚያወጣቸው ዜናዎች ማረጋገጥ እንደሚቻል የክልሉ ከፍተኛ ኃላፊ አመልክተዋል።

ከፍትህ ሚኒስቴር ጋር በመሆኑ ግጭቶች ባሉባቸው አከባቢዎች የጥቃት መጠን ጥናትና ምርመራ ስራዎች እየተሰሩ መሆናቸውንና አለመጠናቀቁን  አቶ ዘካርያስ ደሳለኝ ለአዲስ ሪፖርተር ተናግረዋል። የቢቢሲ መረጃ የአንድን ዘገባ መሰረታዊ መርህ ያላሟላ እንደሆነ አመልክተዋል። 

“ይህን ሲሉ በሴቶች ላይ ጥቃት አልደረሰም እየሉ ነው” ለሚለው “እየተጠና ነው። ድርጊቱ በምን ያህል መጠን፣ በማንና እንዴት እንደተፈጸመ ምርመራ ላይ ነው። ስጋት ያላቸው እህቶችና ቤተሰቦች አሉ። በክልሉ ማን ምን ዓየነት ጭካኔ የተሞላበት ተግባር እየፈጸመ እንደሆነ ከሕዝብ የተሰወረ አይደለም። እናም ጊዜውን ጠብቆ ሁሉም ይፋ ይሆናል” ሲሉ የክልሉ ባለስልጣን ተናግረዋል።

ፌስቡክ፡ https://web.facebook.com/addisreporternews/
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter11

tiktalk – https://www.tiktok.com/@addisreporter3
X፡ https://x.com/addisreporter
ስልክ ቁጥር፡ +251981866434 / +251116393393