ሳዑዲ ዓረቢያ በአሜሪካ የ-1 ትሪሊዮን ዶላር ኢንቨስትመንት ቃል ገባች፤ ኢምሬትስ የ1.4 ትሪሊዮን ውል ገብታ ነበር

አዲስ ሪፓርተር ዋሽንግተን ዲ.ሲ. – የዩናይትድ ስቴትስ እና የሳዑዲ ዓረቢያ የረዥም ጊዜ ግንኙነት አዲስ ምዕራፍ ላይ የደረሰ ሲሆን፣ ፕሬዝደንት ትራምፕ እና የሳዑዲ ልዑል አልጋ ወራሽ መሐመድ ቢል ሳልማን መካከል በተደረገው ስብሰባ ላይ ሳዑዲ ዓረቢያ በዩናይትድ ስቴትስ የምታደርገውን ኢንቨስትመንት ወደ 1 ትሪሊዮን ዶላር ለማሳደግ ስምምነት ላይ መድረሳቸው ታውቋል። ይህ ስምምነት በቅርቡ የተባበሩት አረብ ኢምሬትስ ቀደም ሲል ከገባቸው የ1.4 ቢልዮን ኢንቨስትመንት ዜና ቀጥሎ ትልቁ ነው።

ልዑል አልጋ ወራሽ መጀመሪያ ላይ 600 ቢሊዮን ዶላር የነበረውን የኢንቨስትመንት ቁጥር ወደ አንድ ትሪሊዮን ዶላር ማሳደጋቸውን ያረጋገጡ ሲሆን፣ ይህ ትልቅ ገንዘብ በአሜሪካ ውስጥ በቴክኖሎጂ፣ ሰሚኮንዳክተር እና በዎል ስትሪት የፋይናንስ እንቅስቃሴ ላይ እንደሚውል ተገልጿል። የዚህ ሁሉ ኢንቨስትመንት ትልቁ ትርጉም ደግሞ ለዩናይትድ ስቴትስ ዜጎች ብዙ ስራዎችን መፍጠር መሆኑ ታውቋል።

21 ትሪሊዮን ዶላር ኢንቨስትመንት በአንድ ዓመት ውስጥ

ፕሬዝደንት ትራምፕ እንዳሉት፣ አገሪቱ ከታሪክ ከፍተኛው ቁጥር (3 ትሪሊዮን ዶላር) እጅግ ከፍ ያለ ወደ 20-21 ትሪሊዮን ዶላር ኢንቨስትመንት በአንድ ዓመት ውስጥ እንደምትደርስ ይጠበቃል። ይህ የኢንቨስትመንት ፍሰት በአዳዲስ ፋብሪካዎች፣ በአውቶሞቢል ፋብሪካዎች፣ እና በአርቴፊሻል ኢንተለጀንስ (AI) ዘርፎች ላይ ያተኩራል። ጃፓን፣ ጀርመን፣ ካናዳ እና ሜክሲኮን ጨምሮ ከተለያዩ አገሮች አዳዲስ ፋብሪካዎች እየገቡ ሲሆን፣ አሁን በግንባታ ላይ ያሉ ፋብሪካዎች ቁጥር በአገሪቱ ታሪክ ውስጥ ከማንኛውም ጊዜ በላይ መሆኑ ተገልጿል።

የጂ.ኢ. ቨርኖቫ (GE Vernova) ፋሲሊቲ መሪ እንደገለጹት፣ ኩባንያቸው በዩናይትድ ስቴትስ ውስጥ ከ750 ሚሊዮን ዶላር በላይ ኢንቨስት እያደረገ ሲሆን፣ በተለይም በደቡብ ካሮላይና ግሪንቪል የሚገኘው የጋዝ ተርባይን ማምረቻ ፋብሪካ ምርቱን በሦስት እጥፍ ለማሳደግ። ይህ ኢንቨስትመንት በአጠቃላይ 1,800 የሚጠጉ እውነተኛ የማኑፋክቸሪንግ ስራዎችን ይፈጥራል።

የስትራቴጂክ ትብብር እና ቴክኖሎጂ

የሳዑዲ አልጋ ወራሽ ኢንቨስትመንቱ በአሜሪካ የወደፊት ዕድገት ላይ ባላቸው እምነት ላይ የተመሠረተ እንደሆነ ገልጸዋል። ይህ ኢንቨስትመንት በቴክኖሎጂ፣ በኤአይ (AI)፣ በአየር ማቴሪያሎች እና በማግኔት ጨምሮ በብዙ ዘርፎች ስምምነቶች እየተፈረሙ መሆናቸውን ያመለክታል።

ሳዑዲ ዓረቢያ ለአርቴፊሻል ኢንተለጀንስ (AI) ከፍተኛ ፍላጎት እንዳላት አረጋግጣለች። በአጭር ጊዜ ውስጥ 50 ቢሊዮን ዶላር የሚጠጋ ገንዘብ ሴሚኮንዳክተሮች ላይ እንደምታወጣና ለረጅም ጊዜ በመቶዎች የሚቆጠሩ ቢሊዮን ዶላር እንደምትጠቀም ገልጻለች። ይህ የኤአይ ትኩረት የሳዑዲ ቪዥን 2030 ግቦችን ለማሳካት ወሳኝ ነው፣ በተለይም የሰው ኃይል እጥረትን ለመሙላት የኮምፒውተር ኃይልን መጠቀም አስፈላጊ በመሆኑ። ፕሬዝደንት ትራምፕ ዩናይትድ ስቴትስ በኤአይ ቴክኖሎጂ ከቻይና እጅግ የላቀ መሪ መሆኗን ገልጸዋል።

የመከላከያ ስምምነት እና የ F-35 ሽያጭ

አሜሪካ እና ሳዑዲ ዓረቢያ የሁለትዮሽ መከላከያ ስምምነት ላይ መድረሳቸው ተረጋግጧል። በተጨማሪም ፕሬዝደንት ትራምፕ አሜሪካ ለሳዑዲ ዓረቢያ F-35 ተዋጊ ጄቶችን ለመሸጥ ማቀዷን አረጋግጠዋል። ትራምፕ እንዳሉት ሳዑዲ ዓረቢያ እና እስራኤል ታላላቅ አጋሮች በመሆናቸው ሁለቱም “ከፍተኛውን ደረጃ” (top of the line) ያላቸውን መሳሪያዎች ማግኘት አለባቸው።

የጂኦፖለቲካዊ ጉዳዮች

1. ኢራን: ፕሬዝደንት ትራምፕ ኢራን ከዩናይትድ ስቴትስ ጋር ስምምነት ለመፍጠር “በጣም ትፈልጋለች” ብለው ያምናሉ። ልዑል አልጋ ወራሹ ሳዑዲ ዓረቢያ የአሜሪካ እና የኢራን ስምምነት ክልሉንና ዓለምን የሚያረካ እንዲሆን በቅርብ ትሰራለች።
2. የአብርሃም ስምምነቶች: ልዑል አልጋ ወራሽ የአብርሃም ስምምነት አካል መሆን እንደሚፈልጉ ቢገልጹም፣ ለዚህም ግልጽ የሆነ የሁለት መንግስታት መፍትሄ መንገድ እንዲረጋገጥ ቅድመ ሁኔታ አስቀምጠዋል።
3. ሶሪያ: ፕሬዝደንት ትራምፕ በልዑል አልጋ ወራሽ እና በቱርኩ ፕሬዝደንት ኤርዶጋን የተለየ ጥያቄ መሰረት በሶሪያ ላይ የተጣሉትን ማዕቀቦች መነሳታቸውን ገልጸዋል።
4. ጋዛ: ሳዑዲ ዓረቢያ ለጋዛ መልሶ ግንባታ የሚሆን ገንዘብ ለመስጠት በውይይት ላይ መሆኗንና በእርግጠኝነት ለመርዳት ቃል ገብታለች።

አወዛጋቢ ጉዳዮች ላይ የተሰጡ መልሶች

የጋዜጠኞች ጥያቄ የትራምፕ ቤተሰባቸው በሳዑዲ ዓረቢያ ንግድ መስራት መቻላቸውን እና የሟች ጋዜጠኛን ጉዳይ ያካተተ ነበር።

• የጋዜጠኛ ግድያ: ልዑል አልጋ ወራሹ ጉዳዩን “አሳዛኝ” እና “ትልቅ ስህተት” እንደሆነ ገልጸው፣ በሳዑዲ ዓረቢያ ትክክለኛ የምርመራ እርምጃዎች መወሰዳቸውን እና እንደዚህ ያለ ነገር ዳግመኛ እንዳይከሰት ስርዓቱን እንዳሻሻሉ ተናግረዋል።
• 9/11: የ9/11 አደጋን አስመልክቶ፣ ኦሳማ ቢን ላደን የሳዑዲ ሰዎችን የተጠቀመበት ዋነኛ ዓላማ የአሜሪካ-ሳዑዲ ግንኙነትን ለማፍረስ ነበር ብለዋል። ይህን ግንኙነት ማጠናከር ለአክራሪነትና ለአሸባሪነት መጥፎ በመሆኑ የቢን ላደንን ዓላማ ማክሸፍ ነው ሲሉ አብራርተዋል።

በአጠቃላይ፣ የሁለቱ አገራት ግንኙነት “ከፍተኛ ደረጃ” (top of the line) ላይ መሆኑን ፕሬዝደንት ትራምፕ አፅንዖት ሰጥተዋል። ልዑል አልጋ ወራሽም ይህ ግንኙነት በፖለቲካዊ፣ ኢኮኖሚያዊ፣ ወታደራዊ እና ደኅንነት ረገድ ወሳኝ መሆኑን ገልጸው፣ በቀጣዮቹ ዓመታትም እየጠለቀ እንደሚሄድ እምነታቸውን ገልፀዋል።

ቀደም ሲል የተባበሩት አረብ ኤምሬትስ በዩናይትድ ስቴትስ ለ1።ር ትሪሊዮን ዶላር ኢንቨስትመን መፈረሟን ዋይት ሀውስ ማስታወቁ አይዘነጋም። ይህ ከፍተኛ ማዕቀፍ ያለው ኢንቨስትመንት “የተባበሩት አረብ ኤምሬትስ በአሜሪካ ኢኮኖሚ ውስጥ ያላትን ኢንቨስትመንት በእጅጉ ይጨምራል” ሲል ነበር ዋይት ሀውስ በወቅቱ ባወጣው መግለጫ ያስታወቀው።

የተባበሩት አረብ ኤምሬትስ የ1.4 ትሪሊዮን ኢንቨስትመንት ከሚታወቀው የሁለቱ አገራት ወታደራዊ ስምምነቶች በተጨማሪ፣ ኢነርጂ (ዘይት፣ ጋዝ፣ LNG፣ ዝቅተኛ ካርቦን፣ መሠረተ ልማት) በማኑፋክቸሪንግ (በተለይም አሉሚኒየም) የ AI ማዕከላት ግንባታ፣ ሴሚኮንዳክተሮች እና የወሳኝ ማዕድናት ፣ እንዲሁም ኤሮስፔስ / አቪዬሽን ቦይንግና በመሳሰሉት ላይ መሆኑ ተመልክቶ ነበር።

ፌስቡክ፡ https://www.facebook.com/profile.php?id=61577410241403
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter11
X፡ https://x.com/addisreporter
ስልክ ቁጥር፡ +251981866434 / +251116393393