አዲስ ሪፓርተር — በሩሲያ መዲና ሞስኮ ደቡባዊ ክፍል በመኪና ውስጥ በተጠመደ ቦምብ አንድ ከፍተኛ የሩሲያ ወታደራዊ መኮንን መገደላቸው ተሰማ። የሀገሪቱ የዜና ምንጮች እንደዘገቡት፣ በፍንዳታው ሕይወታቸውን ያጡት ሌተናንት ጀነራል ፋኒል ሳርቫሮቭ ናቸው።
እንደ ሩሲያ ቱዴይ (RT) ዘገባ፣ ፍንዳታው የተከሰተው ጀነራሉ በመኪናቸው ውስጥ በነበሩበት ወቅት ነው። በመኪናው ውስጥ አስቀድሞ ተጠምዶ የነበረው ፈንጂ በደረሰው ከፍተኛ ፍንዳታ፣ ጀነራሉ በቅጽበት ሕይወታቸው ሊያልፍ ችሏል። በጥቃቱ ሳቢያ በደቡባዊ ሞስኮ በሚገኘው በዚሁ አካባቢ የነበሩ ሌሎች ተሽከርካሪዎች ላይም ከፍተኛ አደጋ የደረሰ ሲሆን፣ አንድ ሌላ አሽከርካሪም ከባድ ጉዳት ደርሶበት ወደ ሆስፒታል መወሰዱ ተነግሯል።
የሩሲያ የምርመራ ኮሚቴ በሰጠው መግለጫ፣ የከፍተኛው ጀነራል ሕይወት ማለፉን አረጋግጧል። ኮሚቴው በቦታው ተገኝቶ የፎረንሲክ ምርመራዎችን እያከናወነ እንደሚገኝና ግድያው “በታቀደ የሽብር ጥቃት” ሊፈጸም እንደሚችል በመጠቆም የወንጀል መዝገብ ከፍቶ ምርመራውን አጠናክሮ ቀጥሏል። የደህንነት ኃይሎችም የፍንዳታውን መንስኤና ፈንጂው እንዴት ሊጠመድ እንደቻለ ለማጣራት አካባቢውን ዘግተው ክትትል እያደረጉ ይገኛሉ።
ሌተናንት ጀነራል ፋኒል ሳርቫሮቭ በሩሲያ መከላከያ ሚኒስቴር ውስጥ ከፍተኛ ተሰሚነት ያላቸው አንጋፋ መኮንን ሲሆኑ፣ በተለይም የኦፕሬሽናል ስልጠና መሪ በመሆን ለከፍተኛ ወታደራዊ ባለሙያዎች ስልጠናን በማዘጋጀትና በመምራት ረገድ ቁልፍ ሚና ነበራቸው። ከዚህም በተጨማሪ፣ የተለያዩ ወታደራዊ ኦፕሬሽኖችን በስትራቴጂካዊ መንገድ በማቀድና ልዩ ልዩ ወታደራዊ ኃይሎችን በብቃት በማቀናጀት ረገድ በነበራቸው የላቀ ችሎታና ልምድ በመከላከያ ሠራዊቱ ውስጥ በታላቅ ባለሙያነታቸው የሚታወቁና የሚከበሩ ነበሩ።
ምንም እንኳን እስካሁን ለጥቃቱ ኃላፊነት የወሰደ አካል ባይኖርም፣ ሞስኮ በጥቃቱ ላይ የዩክሬን የኢንተለጀንስ አገልግሎት (SBU) እጅ ሊኖርበት ይችላል የሚል ከፍተኛ ጥርጣሬ እንዳላት ምንጮች ጠቁመዋል። ሩሲያ ቀደም ሲል በግዛቷ ውስጥ ለተፈጸሙ መሰል ጥቃቶች ኪየቭን ስትከስ መቆየቷ ይታወሳል። ጥቃቱ በሩሲያ ወታደራዊ አመራሮች ላይ የሚሰነዘሩ ዒላማ ያደረጉ ግድያዎች እየጨመሩ መምጣታቸውን የሚያሳይ ሲሆን፣ በሞስኮ ከተማ የደህንነት ጥበቃ ላይም ጥያቄዎችን አስነስቷል።
Website፡ https://addisreporter.com/
Email፡ info@addisreporter.com
Telegram፡ https://t.me/addisreporter11
X፡ https://x.com/addisreporter
Phone no ፡ +251981866434 / +251116393393
