[ኦክቶፐሱ] ኢሳያስ አፈወርቂ እና ስውር እጆቻቸው፤ ኦክቶፐስ ስምንት እጆች እሳቸው አምስት

ኢትዮጵያ በትልቅ እንግድነት ገብቶ ነበር። ትልልቅ የክብር መቀመጫዎች ተቀምጠዋል። ተዘፍኖላቸዋል። ለውጥ ደጋፊና አድማቂ መስለው ነበር። በአማርኛ ተናግረው አብረው ሌማት ሲቆርሱ ተጭብጭቦላቸዋል። “ወደብ አጋራችኋለሁ፣ ታሪክ ይቀየራል፣ አብረን እናድጋለን፣ አንለያይም” ወዘተ በማለት ደስኩረዋል። በውቅቱ አልገባንም ነበር። አሁን ሲገባን ያዛኔ የመጣው ኦክቶፐስ ነበር። ኦክቶፐሱ ኢሳያስ!!

ነጻ አስተያየት በብርቱካን ገረመው

አዲስ ሪፖርተር – በባሕር ውስጥ ከሚኖሩ ለተፈጥሮ እንግዳ የሆነ አካላዊ ቅርፅ እና ባሕርይ ካላቸው ፍጥረታት መካከል ኦክቶፐስ እጅግ የተለየና ረቂቅ ነው። ስምንት እጆች ያሉት ይህ ፍጡር፣ አደጋ ሲያጋጥመው በሰከንዶች ውስጥ የቆዳውን ቀለምና ቅርፅ (Texture) ከአካባቢው ጋር በማመሳሰል የመደበቅ ወይም ሌላ ነገር የመምሰል ወይም ሰውነቱን እጥፍጥፍ አድርጎ የሆነ ስርቻ ውስጥ የመሸጎጥ አስገራሚ ችሎታ አለው። ከአፉ በስተቀር አጥንት የሌለው ሙልጭልጭ አካሉ፣ ባለ ሦስት ልብ መሆኑና አደጋ ሲጋረጥበት ጥቁር ቀለም በመርጨት አካባቢውን የማጨለም ብቃቱ፣ ኦክቶፐስን የማይጨበጥና አደገኛ አሳሳች ፍጡር ያደርገዋል። እንዲሁም ይህ ፍጡር አደጋ ሲጋረጥበት የሚወስደው እርምጃ እጅግ አስገራሚ ነው። ራሱን ለማዳን ሲል አንዱን እጁን ቆርጦ ጥሎ ያመልጣል፤ ጥቂት ጊዜ ቆይቶ ደግሞ ያንኑ የቆረጠውን እጅ መልሶ ያሳድገዋል።

በዓለም አቀፍ ፖለቲካ ውስጥም መሠሪ አገራትን እና መሪዎችን በዚህ ፍጡር መመሰል እጅግ የተለመደ ነው። ኦክቶፐስ በስምንቱም እጆቹ በአንድ ጊዜ ብዙ ነገሮችን እንደሚይዝ ሁሉ፣ እንደ ኢሳያስ አፈወርቂ ያሉ መሪዎች በፋይናንስ /ገንዘብ አጠባ፣ ኮንትሮባንድና ዘረፋን ያጠቃለላል/፣ በሚዲያ ፕሮፓጋንዳ፣ በእጅ አዙር ጦርነትና በተለያዩ አደረጃጀቶች አማካኝነት እጃቸውን በጠላት አገራት ውስጥ በማስገባት የውጭ ጉዳይ ፖሊሲ ግባቸው ያስፈጽማሉ። እነዚህ መሪዎች ግለሰቦችንና የፖለቲካ ፓርቲዎችን እንደ ኦክቶፐስ እጅ በመጠቀም፣ ሳይታወቁ የሌላን ሀገር የውስጥ ጉዳይ በቁጥጥራቸው ሥር የማዋልና ከውስጥ የማዳከምና የማፍረስ ስልታዊ ሤራ በማምረት ይታወቃሉ።

ኦክቶፐስ ራሱን ለማዳን ሲል አንዱን እጁን ቆርጦ ጥሎ ያመልጣል፤ ጥቂት ጊዜ ቆይቶ ደግሞ ያንኑ የቆረጠውን እጅ መልሶ ያሳድገዋል። ኢሳያስ አፈወርቂም በኢትዮጵያ ፖለቲካ ውስጥ የሚከተሉት ስልት ልክ እንደዚህ የኦክቶፐስ ባሕርይ ነው። በችግር ጊዜ አጋራቸውን ቆርጦ በመጣል፣ ወይም በማስበላት ማምለጥና መልሶ መወዳጀት የተካኑበት ስልት ነው። ለዚህ ትልቅ ማሳያ የሚሆነን የ1983ቱ የሁርሶ ክስተት ነው። በወቅቱ ኢሳያስ ከትህነግ ጋር በመሆን አዲስ አበባ ሲገቡ፣ የኦነግን ሠራዊት “በእርቅና በሽምግልና” ስም አሳምነው ትጥቅ እንዲፈታ አደረጉት። ያኔ ጥቅማቸው ከትህነግ ጋር ስለነበር ኦነግን እንደ ኦክቶፐስ እጅ ቆርጠው ጣሉት። ነገር ግን ከቆይታ በኋላ ከትህነግ ጋር ግጭት ውስጥ ሲገቡ፣ ያንኑ የቆረጡትን እጅ (ኦነግን) አስታውሰው ኤርትራ ውስጥ መጠለያ በመስጠት ለራሳቸው የፖለቲካ መጠቀሚያነት መልሰው አሳደጉት።

ኢሳያስ “ትህነግ” የተሰኘውን እጃቸውን ሲፈልጉ ቆርጠው ይጥሉታል፣ በሌላ ጊዜ ደግሞ እቅፋቸው ውስጥ ይከቱታል። እኚህ እንደ ኦክቶፐሱ ‘ባለ ሶስት ልብ’ የሆኑት ሽማግሌ መሪ፣ ከላኪዎቻቸው በስተቀር ቋሚ ወዳጅ የላቸውም፤ ያላቸው ቋሚ ጥቅም ብቻ ነው። ሌተናል ጄኔራል ዮሐንስ ገብረ መስቀል በትክክል እንዳሉት፣ ኢሳያስ ነገ ከኢትዮጵያ መንግሥት ጋር ቢታረቁ ዛሬ የታቀፏቸውን ኃይሎች ለኢትዮጵያ አሳልፎ ለመስጠት ቅንጣት ታህል አያቅማሙም። በአጠቃላይ ኢሳያስ ማንንም በቋሚነት ወዳጅ የማያደጉ፣ ሁሉንም ለጊዜያዊ ግብ የሚጠቀሙ የቀጠናው “ሙልጭልጭ ኦክቶፐስ” ናቸው። አሁን በተግባር እያየን ያለነው ይኸንኑ ነው።

የኤርትራው አምባገነን መሪ ኢሳያስ አፈወርቂ ከኢትዮጵያ ጋር የሚወዳደር የኢኮኖሚ፣ የወታደራዊና የቴክኖሎጂ አቅም እንደሌላቸው ጠንቅቀው ያውቃሉ። ይህ የኃይል ሚዛን ለመማመጣጥን ኢሳያስ የኦክቶፐስን ባሕርይና ስልት በመከተል ኢትዮጵያን ከውስጥ ለማዳከም እየሠሩ ይገኛል።  

ኢሳያስ እንደ ኦክቶፐስ ኢትዮጵያ ውስጥ አምስት እጃቸውን ዘርግተዋል። እነዚህ እጆች ራሳቸውን ለኢሳያስ “ወዶ ገብ ባንዳና ተላላኪ” የሆኑት የእኛው ጉዶች ናቸው። እጆቹም ብረት ያነሱ እንደ ትህነግ፣ ፋኖ እና ኦነግ ሸኔ ያሉ ኃይሎችን፣ በሕጋዊ መልኩ የሚንቀሳቀሱ የሃገር ውስጥ የፓለቲካ ፓርቲዎች፣ በዲያስፖራ የሚገኙ ትርምስና የሽግግር መንግሥት አመቻች የቴክኒክ ኮሚቴዎች፣ በይፋና በሕቡዕ የተደራጁ ሚዲያዎች ናቸው። እነዚህን ኃይሎች በፋይናንስ፣ በመረጃ፣ በስልጠና እና በሎጅስቲክ በመደገፍ ሃገራቸውን ከውስጥ ወግተው እንዲያዳክሙላቸው በማድረግ የተላላኪነት ሚናቸውን ይወጣሉ።

በዚህ ጽሑፍ አሁናዊ የኢሳያስን “ኦክቶፐሳዊ” ባሕርይና በኢትዮጵያ ውስጥ የዘረጉትን አምስት የጥፋት እጆች ለመመርመር እንሞክራለን።

የኢሳያስ “ኦክቶፐሳዊ” የውክልና ጦርነት ስልት

ኦክቶፐስ ጠላቱ በቀጥታ ወደ ዋናው አካሉ እንዳይቀረብ ጥቁር ቀለም በመርጨት አካባቢውን እንደሚያጨልመው ሁሉ፣ ኤርትራም የኢትዮጵያ መከላከያ ሠራዊት ወደ ድንበሯ እንዳያተኩር በትግራይና በአማራ ክልሎች የጦርነት ጉም እንዲነፍስ ታደርጋለች። እነዚህን ክልሎች እንደ “Buffer Zone” ወይም የመከላከያ ጋሻ በመጠቀም፣ የጥፋት ቀጠናው ከድንበሯ ርቆ በኢትዮጵያ መሬት ላይ እንዲቆይ ታደርጋለች። ይህ ስልት ኤርትራን ከቀጥታ ጦርነት ስጋት ነጻ የሚያደርጋት ቢሆንም፣ የኢትዮጵያ ሰሜናዊ ክፍሎች ግን ለረዥም ጊዜ የኦክቶፐስ ቀለም እንደረገጠው ውሃ የለየለት የጦርነት ቀጠና ሆነው እንዲቀጥሉ ተፈርዶባቸዋል።

ይህ ፍጡር አደጋ ሲጋረጥበት አንዱን እጁን ቆርጦ ጥሎ በማምለጥና ቆይቶ መልሶ በማሳደግ እንደሚታወቀው ሁሉ፣ ኤርትራም እንደ ፋኖ እና ትህነግ ያሉ የታጠቁ ኃይሎችን እንደ ሁኔታው የምታሳድጋቸውና የምትቆርጣቸው “ተለዋዋጭ እጆቿ” አድርጋቸዋለች። የኤርትራ ከፍተኛ መኮንኖች መቀሌ ድረስ በመምጣት ከትህነግ አመራሮች ጋር የሚያደርጉት ምክክርና የመረጃ ልውውጥ፣ የመከላከያን ዓቅም ለመረጃ ምዝበራ ተጋላጭ ያደርገዋል። እነዚህ ኃይሎች በገንዘብና በትጥቅ ተደግፈው የመንግሥት ሠራዊት በውስጥ ሥራ እንዲጠመድ ሲደረግ፣ ለባለ “ሦስት ልቡ” ኢሳያስ ደግሞ ምቹ መደላድል ይፈጥራል።።

ኦክቶፐስ በስምንቱም እጆቹ በአንድ ጊዜ ብዙ ነገሮችን እንደሚይዝ፣ ኤርትራም የውክልና ጦርነቱን ወደ አማራ ክልል በተለይም ወደ ጎጃምና ደቡብ ጎንደር በማስፋት የመንግሥትን ትኩረት ትበታትናለች። በዚህም ሕዝቡ በመንግሥት ላይ እምነት እንዲያጣ፣ መሠረተ ልማቶች እንዲወድሙና የክልሉ ኢኮኖሚ እንዲሽመድመድ በማድረግ መንግሥት በቤት ውስጥ ቀውስ እንዲተበተብ ታደርጋለች። ይህ ስልታዊ ብልሃት የኢትዮጵያ የውጭ ፖሊሲና የባሕር በር ፍላጎት በውስጥ ፖለቲካ አረንቋ ውስጥ ታንቆ እንዲቀር የሚያደርግ የ”ሙልጭልጭ” ዲፕሎማሲ መገለጫ ነው።

ኤርትራ እነዚህን ኃይሎች በማሠልጠንና ወታደራዊ ምክር በመስጠት የሽምቅ ውጊያው እንዲራዘም ማድረጓ፣ ራሷን ለማዳን እጁን እንደሚቆርጥ ኦክቶፐስ ዓይነት ተግባር ነው። የጦርነቱ ቀጠና ከኤርትራ ድንበር በራቀ ቁጥር የራሷን የድንበር ደኅንነት ለማስከበር የምታወጣው ወጪ ይቀንሳል። ይህ ስትራቴጂ በኢትዮጵያ ውስጥ ያሉ የውስጥ ልዩነቶችን ወደ ወታደራዊ ግጭት በመቀየር፣ ሀገሪቱ ፊቷን ወደ ልማት ሳይሆን ወደ እርስ በርስ ፍጅት እንድታዞር የሚያደርግና የኢትዮጵያን ብሔራዊ ጥቅም የሚበላ የቀጠናው “ኦክቶፐሳዊ” ደባ ነው።

የዲያስፖራ ተፅዕኖና የኦክቶፐስ “ረጅም እጆች” ስልት

ኦክቶፐስ ሳይንቀሳቀስ ባለበት ረጅምና ተለዋዋጭ እጆቹ ርቆ የሚገኝን ምርኮ እንደሚይዘው ሁሉ፣ ኤርትራም በውጭ የሚገኙ የዲያስፖራ ኃይሎችን እንደ “ረጅም እጆቿ” ትጠቀምባቸዋለች። እነዚህ ኃይሎች በዲፕሎማሲያዊ መድረኮችና በዓለም አቀፍ ተቋማት ዘንድ የኢትዮጵያን ገጽታ በማጠልሸት፣ ሀገሪቱ በኢኮኖሚና በፖለቲካ እንድትገለል ከፍተኛ ዘመቻ ያደርጋሉ። ይህ ስልት ኤርትራ ራሷን ከፊት ሳታሳይ፣ በዲያስፖራው ስም የኢትዮጵያን ብሔራዊ ጥቅም ለማዳከም የምትጠቀምበት “ሙልጭልጭ” የሤራ ስልት ነው። አንዳንዶቹም ለኤርትራ መሥራታቸውን በውል ሳያውቁ፤ እንዲያውም “የሻዕቢያ ተቃዋሚ ነን” እያሉ የኢሳያስ ሎሌ ሆነዋል። ምክንያቱም ኤርትራ ለእያንዳንዱ ተቃዋሚ ሸማውን በልኩና በሚፈልገው ቀለምና ዲዛይን አስተካክላ ስለምትሰፋለት ነው።

እነዚህ የዲያስፖራ ስብስቦች እንደ ኦክቶፐስ እጅ ቅርጻቸውንና ስማቸውን እየቀያየሩ (ለምሳሌ “የሽግግር መንግሥት አመቻች”፣ “የሰብዓዊ መብት ተሟጋች”)፣ በሀገር ውስጥ ካሉ አክራሪ ኃይሎች ጋር በገንዘብና በሃሳብ ይተሳሰራሉ። ልክ ኦክቶፐስ አንዱ እጁ የያዘውን ምግብ ወደ አፉ እንደሚያቀርበው፣ የዳያስፖራ ተቃዋሚዎችም ከውጭ የሚሰበስበውን ገንዘብና መረጃ ወደ ሀገር ውስጥ በማፍሰስ ግጭቶች እንዲባባሱና መንግሥት በውስጥ ችግር እንዲወጠር ያደርጋሉ። ይህ የተቀናጀ ሥራ መንግሥት ፊቱን ወደ ቀጣናዊ የባሕር በር ጥያቄዎች እንዳያዞር እግሩን በሀገር ውስጥ ትርምስ የማሰር ስውር አጀንዳ ነው።

ከዚህም በተጨማሪ፣ የዳያስፖራ ተቃዋሚዎች በዓለም አቀፍ ደረጃ የሚፈጥረው “የሐሰት የችግር ትርክት” ልክ ኦክቶፐስ ጠላቱን ለማስፈራራት ራሱን አግዝፎ የሚያሳየው ነው። በኢትዮጵያ ውስጥ “መንግሥት የለም”፣ “ሀገሪቱ እየፈረሰች ነው” የሚሉ ፕሮፓጋንዳዎችን በማስተጋባት፣ የውጭ ኢንቨስትመንትና የልማት ዕርዳታዎች እንዲቆሙ ጫና ይፈጥራሉ። ይህ ኢኮኖሚያዊ አፈና ኢትዮጵያን ደካማና ለኤርትራ ተፅዕኖ ተገዢ እንድትሆን ለማድረግ የታለመ የ”ባለ ሦስት ልብ” ስሌት አካል ነው።

እነዚህ የዲያስፖራ ኃይሎች በኤርትራ አስተናጋጅነትና መሪነት የሚሰጡ የፖለቲካ ሥልጠናዎችና የሚወጡ መግለጫዎች፣ የኢትዮጵያን ሉዓላዊነት በውክልና የመጋፋት ተግባራት ናቸው። ኦክቶፐስ አደጋ ሲመጣበት አንዱን እጁን ቆርጦ እንደሚጥለው ሁሉ፣ ኤርትራም እነዚህን የዲያስፖራ ኃይሎች ለጊዜያዊ ጥቅሟ ትጠቀምባቸዋለች፤ አስፈላጊ ሆኖ ሲገኝ ደግሞ አሳልፋ ለመስጠት አታቅማማም። ይህ ሁኔታ ዲያስፖራው ለሀገሩ ከማሰብ ይልቅ የቀጠናው “ኦክቶፐስ” ሰለባና መሣሪያ እየሆነ መመላለሱን የሚያሳይ አሳዛኝ እውነታ ነው።

የሚዲያ ዘመቻና የኦክቶፐስ “የማሳሳት” ስልት

ኦክቶፐስ አደጋ ሲጋረጥበት ጥቁር ቀለም በመርጨት አካባቢውን አጨልሞ አቅጣጫ እንደሚያስጠፋ ሁሉ፣ ኤርትራና ደጋፊዎቿም በገንዘብ የሚደጎሙ የሚዲያ ተቋማትን በመጠቀም የሐሰተኛ መረጃ (misinformation and disinformation) መርዝ ይረጫሉ። እነዚህ ተቋማት በብሔርና በኃይማኖት መካከል ግጭት የሚቀሰቅሱ ትርክቶችን በማሰራጨት፣ ሕዝቡ በመንግሥት ላይ ያለው እምነት እንዲሸረሸርና የሀገር ፍቅር ስሜቱ እንዲቀንስ ያቅዳሉ። ይህ ስልታዊ “ማጨለም” ኅብረተሰቡ እውነታውን በንጽህና እንዳያይ በማድረግ፣ የቀጠናው “ሙልጭልጭ” ተዋናዮች በኢትዮጵያ የፖለቲካ ሰማይ ላይ የፈለጉትን ትርክት እንዲጋልቡ ዕድል ይፈጥርላቸዋል።

በተለይም በጠቅላይ ሚኒስትሩና በከፍተኛ አመራሮች ላይ የሚሰነዘሩ የግለሰብ ስብዕና ማጥፋት (character assassination) ዘመቻዎች፣ ኦክቶፐስ አደን ከመጀመሩ በፊት የሚረጨውን ሽባ የሚያደርግ መርዝ ይመስላሉ። ይህ የስነ-ልቦና ጦርነት (psychological warfare) አመራሩ በሕዝብ ዘንድ ያለው ተቀባይነት እንዲላላና የተሳሳተ ምስል እንዲገነባ በማድረግ፣ ኅብረተሰቡን በጥርጣሬና በፍርሃት ውስጥ ይዘፍቃል። የመሪዎች ተሰሚነት በዲጂታል ፕሮፓጋንዳ ሲመረዝ፣ የመንግሥት መዋቅርም እንደ ኦክቶፐስ አጥንት የሌለው አካል እየሳሳና እየላላ እንዲሄድ ታስቦ የተወጠነ ሤራ ነው።

እነዚህ የሚዲያ እጆች በዲጂታል ቴክኖሎጂ ታግዘው የሀገሪቱን ችግሮች በማጋነንና ጥንካሬዎችን በማኮሰስ፣ ኢትዮጵያ ወደ መፈራረስ እየሄደች እንደሆነ ለዓለም ያሳያሉ። ኦክቶፐስ ራሱን ትልቅ አድርጎ በማሳየት ጠላቱን እንደሚያስፈራራው ሁሉ፣ ይህ ዘመቻም የውጭ ባለሀብቶችና ዲፕሎማቶች በሀገሪቱ ላይ ያላቸውን እምነት እንዲያጡ በማድረግ ኢኮኖሚያዊ ጫናውን ያከብደዋል። ግቡም ግልጽ ነው፤ መንግሥት በኢኮኖሚና በዲፕሎማሲ ተዳክሞ ለኤርትራ “ባለ ሶስት ልብ” ስሌትና ለቀጠናዊ ፍላጎቷ እጅ እንዲሰጥ ማስገደድ ነው።

በማኅበራዊ ሚዲያ የሚሰራጩ በሰው ሠራሽ አስተውሎት (AI) የተቀነባበሩ ቪዲዮዎችና ፎቶዎች የሚፈጥሩት የመረጃ ማዛባት፣ የኢትዮጵያን የመረጃ ሉዓላዊነት የሚጥስ ሌላኛው የኦክቶፐስ እጅ ነው። ይህ ስልት ሕዝቡ ከታማኝ የመንግሥት መረጃዎች ይልቅ በውጭ በሚደጎሙ አውታሮች እንዲተበተብ በማድረግ ሀገራዊ አንድነትን ይሸረሽራል። ኦክቶፐስ በስምንቱም እጆቹ የያዘውን ምርኮ እንደማይለቅ፣ ይህ የሚዲያ መረብም የኢትዮጵያን ሕዝብ ስነ-ልቦና በሀሰት ትርክት ተብትቦ በመያዝ ሀገሪቱ ፊቷን ወደ ስልታዊ ብሔራዊ ጥቅሞቿና ወደ ባሕር በር ጥያቄዎቿ እንዳታዞር የሚያደርግ አደገኛ የጥፋት መሣሪያ ነው።

ይህ ዝልግልግ ፍጡር አካባቢው ያሉትን ፍጡራን ለማደናገር እንደሚረጨው መርዝ ተከፋዮቹ ሚዲያዎች “በገፊና ጎታች” ስልት ሤራ ይበጅላቸዋል። የኢሳያስ አንዱ እጃቸው የሆነው የታጠቀው ኃይል ንጹሃንን እንዲገል ይደረጋል። ገድለው ሲያበቁ ገዳዮቹ ድራማውን ለማሳመር ቪዲዮ ወይም ፎቶ አዘጋጅተው ለሚመለከተው ክፍል ይልካሉ። ከዛ ማኅበራዊ ሚዲያው ጮሆ ያስጮሃል። ለዚሁ ሥራ ተብሎ “ሕጋዊ” የተባሉትና “ሰላማዊ ታጋይ” ነን የሚሉት በሀገር ውስጥ ያሉት ፓርቲዎች ዜናውን በማኅተም አስደግፈው፣ በፊርማ አጅበው፣ ሕጋዊ ሰነድ አድርገው፣ ጩኸቱን አንድ ደረጃ ከፍ ያደርጉታል። ጥቁር ለባሾችና አስለባሾች እንዲያዜሙበት ይደረጋል። ይህ ተዳምሮ ሕዝብ እንዲቆጣ ያለማቋረጥ ይሠራበታል። እንዲህ ባለው መናበብ ፊልም ተፈብርኳል። ሰነድ ተሠርቷል። ሃሰተኛ ምስክርነት ተሰጥቷል። ከመደበኛ ቲቪ እስከ ተራ የማኅበራዊ ዓውድ አገርን ለማዛል መረጃ በማፋለስ ኢትዮጵያ ላይ መርዝ ተረጭቷል።

በዲሞክራሲ ስም የሚነገዱ ተለዋዋጭ የፓለቲካ ፓርቲ ሴሎች

ኦክቶፐስ በሰከንዶች ውስጥ የቆዳውን ቀለምና ቅርፅ ከአካባቢው ድንጋይ ወይም አሸዋ ጋር እንደሚያመሳስል ሁሉ፣ በሀገር ውስጥ የሚገኙ አንዳንድ ተቃዋሚ ፓርቲዎችም የዲሞክራሲን፣ የሰብዓዊ መብትንና የነጻነትን ቋንቋ በመላበስ እውነተኛ ማንነታቸውን ይደብቃሉ። የሚናገሩት ስለ ሀገር ዕድገትና ስለ ሕዝብ መብት ቢመስልም፣ በተግባር ግን የኤርትራን ደም መጣጭ (ቫምፓየር) ሕልምና ግቦች ለማሳካት የተሰለፉ ናቸው። እነዚህ ቡድኖች በተለይም ኢትዮጵያን ወደብ አልባ የማድረግና የፌዴራል መንግሥቱን የማዳከም ስሌታቸው እውን እንዲሆን የኢትዮጵያን ሠንደቅ ለብሰው አገራቸውን ያርዳሉ።

ይህ “ማንነትነና ቅርፅ የመለወጥ” (camouflage) ብልሃት ፓርቲዎቹ የኢትዮጵያን ወቅታዊ የፖለቲካ ውጥረቶች እንደ አጋጣሚ በመጠቀም የኤርትራን ትርክቶች በሀገር ውስጥ የክርክር መድረኮች ላይ ያለምንም ሃፍረት እንዲያንጸባርቁ ያስችላቸዋል። በምርጫና በፖለቲካ ውይይቶች ወቅት የሚሰነዝሯቸው ሃሳቦች ከኤርትራ መንግሥት መግለጫዎች ጋር ፍጹም መመሳሰላቸው፣ በዲሞክራሲያዊ ሽፋን ውስጥ የተደበቀውን የ”ባለ ሶስት ልብ” ተላላኪነትን በግልጽ ያሳያል። ልክ እንደ ኦክቶፐስ አካባቢውን መስለው አድብተው ምርኳቸውን እንደሚጠብቁ ሁሉ፣ እነዚህም አካላት የሀገርን ሉዓላዊነት አደጋ ላይ የሚጥል አጀንዳ ይጋልባሉ።

እነዚህ ፓርቲዎች በሀገር ውስጥ “ሕጋዊ ተቃዋሚ” በሚል ስም ተሰግስገው የመንግሥትን የፖለቲካና የዲፕሎማሲ አቅም ከውስጥ የማላላት ሥራ ይሠራሉ። ኦክቶፐስ በቅርፅ ለውጡ ጠላቱን አዘናግቶ ድንገተኛ ጥቃት እንደሚሰነዝር፣ እነሱም የሀገርን ብሄራዊ ጥቅም የሚነኩ ውሳኔዎች ላይ የመንግሥትን እጅ ለመጠምዘዝ ይጥራሉ። ሕዝቡ በመንግሥት ላይ ያለውን እምነት እንዲያጣና ሀገራዊ አንድነት እንዲላላ በማድረግ፣ የኤርትራን ተፅዕኖ በሀገር ውስጥ ጉዳዮች ላይ ለማሳደግ ሌት ተቀን ይተጋሉ።

የኦክቶፐስ ተፈጥሮዓዊ ባሕርይ የሆነው አደጋ ሲገጥመው “እጁን ቆርጦ የመጣል” ስልት በእነዚህ ፓርቲዎች ዘንድ በስፋት ይስተዋላል። ጥቅማቸው ሲነካ ወይም ስውር ሤራቸው ሲጋለጥ፣ ራሳቸውን ከአጋሮቻቸውና ከውጭ ኃይሎች ጋር እንዳልተገናኙ አድርገው በመቁረጥ ከሕግ ተጠያቂነት ለማምለጥ ይሞክራሉ። ነገር ግን የፖለቲካው አየር አመቺ ሲሆንና አዲስ አጋጣሚ ሲፈጠር፣ ልክ እንደ ኦክቶፐስ እጅ የቆረጡትን ግንኙነት መልሰው በማሳደግ የውጭ ኃይሎችን ፍላጎት ለማገልገል ዳግም በቁርጠኝነት ይሰለፋሉ። 

በእነዚህ ኃይሎች በዲሞክራሲያዊው ሂደት ውስጥ ሰርገው በመግባት የሀገርን የውስጥ ጉዳይ በቁጥጥራቸው ሥር የማዋልና ከውስጥ የማዳከም የ”ሙልጭልጭ ኦክቶፐስ” ስልታዊ ብልሃትን በተግባር እያሳዩ ይገኛሉ። ይህ የተቀናጀ የክህደት ጉዞ፣ ኢትዮጵያ ፊቷን ወደ ስልታዊ የልማት ግቦቿና ወደ ባሕር በር ጥያቄዎቿ እንዳታዞር እግሯን በፖለቲካ አረንቋ የመጠፍነግ ሤራ አካል ነው። ስለሆነም፣ እነዚህን “ቅርፅ ለዋጭ” የጥፋት እጆች ነቅቶ መጠበቅና ሤራቸውን ማክሸፍ የኅልውና ጉዳይ ነው።

ማጠቃለያ

ኢሳያስ መልካቸውን በመቀያየር፣ ልቦቻቸውን በመሸሸግ፣ አቅጣጫ በመቀየር፣ ቆርጦ በመጣልና በማስበላት፣ በቂምና በክህደት፣ ከበታችነት ስሜት በሚወለድ ሴራ፣ ተላላኪነትንና ባርነትን እንደ ጌጥ የሚኦቅጥሩ፣ የመንግስትነት ክብርና ወግ የሌላቸው፣ ተላለከውና ሰርቀው አገር የሚመሩ፣ በስጋትና ጭንቀት አረመኔነት ቤቱን የሰራባቸው፣ በባዶ ቂጥ የሚወራጩ፣ በግርድና በሚያገኙት ምንዳ ሌሎችን የመቅጠርና አዋርደው አሽከር ማድረግ የቀናቸው ኦክቶፐስ ናቸው።

በአትላንቲክ ካውንስል የአፍሪካ ማዕከል ምክትል ዳይሬክተር የሆኑት ብሮንዊን ብሩቶን Ethiopia and Eritrea Have a Common Enemy በሚል ርዕስ በለውጡ ማግስት ባሳተሙት “ትንቢት” የሚመስል ጽሁፋቸው ኦክቶፐሱ ኢሳያስ ከኢትዮጵያ ጋር አብረው ሊሄዱ የማይችሉበትን ነጥቦች አስቀምጠው ነበር።

ብሮንዊን ብሩቶን እንደሚሉት ልክ በኢትዮጵያ እንደተካሄደው በአስመራም ለውጥ የማይካሄድ ከሆነ ለውጡ ጎማው እንደሚተነፍስ ተናግረው ነበር። ኦክቶፐሱ ኢሳያስ በኤትዮጵያ የተጀመረው ለውጥ ስጋት ሆኖባቸው ነበር። ይህን ስጋታቸውን በአንዱ ልባቸው ደብቀው የለውጡ ደጋፊ ሆነው አዲስ አበባ ተመላለሱ።

እንደ ኦክቶፐሱ ራሳቸውን እየቀያየሩና የተሳሳተ ገጽ እያላበሱ “ወደብ እንጋራለን፣ አብረን እንሰራለን፣ አንድ ሕዝብ ነን” ብለው በኦክቶፐሳዊ ማንነታቸው በአማርኛ ነገሩን። ኢትዮጵያ ሰው፣ ለዚያውም መሪ የተባለ መስሏት አደነቅች። ቂም ያረገዙትና ግብጽ የጠፈጠፈቻቸው ኢሳያስ ሳይሆን የመጣውና አዲስ አበባ የተሞሸረው ኦክቶፐሱ ነበር።

በኢትዮጵያ የታየው ለውጥ በኤርትራ ተቃውሞ ሊያዋልድ ስለሚችል ኦክትፐሱ ኢሳያስ ላኪዎቻቸው በሰጧቸው ተልዕኮና በጀት ብዙ እጆችና እግሮችን ፈለፈሉ። ቀድመው በታሪክ ሊረሳ በማይችል መልኩ ቆርጠው የበሉትን ትህነግን መልሰው ተወዳጁ። እኤአ ሰኔ 20 (ሰኔ 13) ባደረጉት ንግግር  “መርዘኛ፣ በጣም አደገኛ፣ (ተንኮለኛና ምቀኛ)  ሲቀጥሉም “ጥምብ አንሣዎች” ያሉትን የትህነግ እጃቸውን መልሰው “ጽምዶ” በሚል ማዳበሪያ አሳድገው ዳግም አካላቸው አደረጉት። ኢትዮጵያን ለማተራመስና የጀመረችውን ጉዞ ለማኮላሸት፣ በስሉ እንደሚታየው ራሳቸውን “ኢትዮጵያዊ” የሚሉ እግሮችን አብቅለው ዘመቻ ጀመሩ።

እንደ ኦክቶፐስ ራሳቸውን እየቀያየሩና መርዝ እየረጩ ኢትዮጵያን ለማወክ መርዛቸውን የሚጋቱላቸው ተላላኪ ሚዲያ፣ ፖለቲከኞች፣ አክቲቪስት ነን ባዮች፣ እዛም እዚህም የሚተኩሱ ታጣቂዎችን፣ እዛና እዚህ የሚጫወቱ ፓርቲዎችን፣ ወዘተ አዘጋጁ። ተላላኪዎቹን ልክ እንደ ኦክቶፐሱ እግሮች በመጠቀም በግርድና የሚያገኙትንና በስርቆት የሚያገኙትን ሳንቲም እየረጩ “ምርጫ ማኮላሸት ወይም ሞት” ብለው ተነስተዋል። ይህንኑ መፈክር የገረድ ገረድ ለመሆን የማሉ ከሃጂዎች ተቀብለው ኢትዮጵያን ለማተራመስ እየተወራጩ ነው። ኦክቶፐሱ ነገ ቆርጦ የሚጥላቸው እግሮቹ ስለመሆናቸው ጥርጥር የለውም። ኦክቶፐስ ምንም እንኳን አስገራሚ ዝልግልግ ባለ ሶስት ልብ ፈጥረት ቢሆንም ከሰማይ እየተወረወሩ የሚውጡት ወፎች ጠንቁ ናቸው። በህብረት የሚያድኑት ዶልፊኖች ይሰለቅጡታል።

ዝግጅት ክፍሉ ጽሁፉ የጸሃፊዋ አስተየት ብቻ ነው። የሚወክለውም ጸሃፊዋንና በአሳባቸው የሚስማሙትን ወገኖች ነው። ምላሽ ጽሁፍ ለሚያቀርቡ ክፍት ነው።

ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter2
X፡ https://x.com/amejuju?s=21
https://web.facebook.com/addm