አዲስ ሪፖርተር – የኢትዮጵያ ፌድራል መንግሥት እና የትግራይ ሕዝብ ነጻ አውጪ ግንባር (ትህነግ) በተያዘለት መርሃ ግብር መሰረት ይካሄዳል ከተባለው ምርጫ በፊት ፖለቲካዊ ውይይት እንዲጀምሩ በአዲስ አበባ የሚገኘው የአውሮፓ ኅብረት ተልዕኮ የኅብረቱ አባል አገራት እና የኖርዌይ ኤምባሲ በጋራ ጥሪ አቅርበዋል። በአገራዊ የምክክር ኮሚሽን በኩል እንዲሳተፉም አበረታተው ድጋፍ እንደሚያደርጉ አመልክተዋል።
አበባ የሚገኙ ሃያ ሁለት የሚጠጉ የአውሮፓ ኅብረት አባል ሀገራት ኤምባሲዎች ከአውሮፓ ህብረት በኢትዮጵያ ጋር በጋራ መግለጫ አውጥተዋል። የፕሪቶሪያ ሥምምነት የተፈረመበትን ሦስተኛ ዓመት ምክኛት በማድረግ እነዚሁ አካላት ባወጡት መግለጫ በሰሜን ኢትዮጵያ ሰላምን ማጠናከር አስፈላጊ እንደሆነ ገልጸዋል።
ዲፕሎማቶቹ የፕሪቶሪያ ግጭት የማቆም ሥምምነት የተፈረመበትን ሦስተኛ ዓመት በማስመልከት ጥቅምት 23 ቀን 2018 ይፋ ባሰራጩት የጋራ መግለጫ ነው። ሥምምነቱ ያሰገኘውን ውጤት አስታውሰዋል። ከፈተኛ ሰብአዊና ቁሳዊ ቀውስ ያስከተለውን ግጭት ያስቆመውን የፕሪቶሪያ ስምምነት አማካይነት ባለፉት ሦስት ዓመታት ተግባራዊ ተደረጉ ያሏቸውን አዎንታዊ እርምጃዎች በመግለጫቸው ጠቅሰዋል።
ተቋርጠው የነበሩ መሠረታዊ አገልግሎቶች ሥራ መጀመር፣ የሰብአዊ ርዳታ አቅርቦት መሻሻል፣ የቀድሞ ታጣቂዎች ትጥቅ አስፈትቶ በማሰልጠን ወደ ማኅበረሰቡ የሚቀላቀሉበት ሒደት መጀመር እና የተወሰኑ ተፈናቃዮች ወደ ቀያቸው መመለስና የመሳሰሉት መግለጫው በበጎ ያነሳቸው ክንውኖች ናቸው፡፡
የተፈናቀሉ ሰዎችን “ከዓለም አቀፍ ሰብአዊ ሕግ እና ምርጥ ተሞክሮዎች” በተስማማ መልኩ መሉ ወደ ቀያቸው መመለስ እና ተጎጂዎችን ማዕከል ያደረገ ተቀባይነት ያለው የሽግግር ፍትኅን ጨምሮ በፕሪቶሪያ ከተፈረመው ግጭት የማቆም ሥምምነት ሒደት ጋር በተያያዘ ያሉ ልዩነቶችን ለመፍታት የሚደረገውን ጥረት ለመደገፍ ፈቃደኛ መሆናቸውን አሳውቀዋል።
“ሁሉም ወገኖች ግጭት የማቆም ሥምምነቱን ተግባራዊ እንዲያደርጉ እና ቀሪ ተግዳሮቶችን ለመፍታት በጋራ እንዲሰሩ” በኢትዮጵያ የሚገኘው የካናዳ ኤምባሲ ጥሪ አቅርቧል። ግጭት የማቆም ሥምምነቱ “ለትግራይ ሰላም ቁልፍ ነው” ያሉት በአሜሪካ ሴኔት የውጭ ጉዳዮች ቋሚ ኮሚቴ ሰብሳቢ ጂን ሻሒን በበኩላቸው የኢትዮጵያ ፌድራል መንግሥት እና ህወሓት “የሥምምነቱን ድንጋጌዎች እንደታቀደው ሙሉ በሙሉ ተግባራዊ” እንዲያደርጉ ጥሪ አስተላልፈዋል።
