አዲስ ሪፖርተር – በአማራ ክልል ጠብ መንጃ ያነሳው ፋኖ “የጦር ሜዳ ድል” ሲል የሚቆጥራቸውን ገድሎቹን በመዘርዘር የአማራ ክልል ትምህርት ቢሮ ይፋ አደረገ። ቢሮው ፋኖ “የጦር ሜዳ ድሌ” በሚል የሚመጻደቅባቸውን “ድሎቹን” ያስታወቀው ለአዲስ ሪፖርተር ነው።
“ዓላማው ምን እንደሆነ የማይታወቅ የፋኖ ስሌት ትውልድን በልቷል፣ ተስፋቸውን ቀምቷል፣ የዕውቀት በሮችን ዘግቷል፣ መምህራንን ከተማሪዎች ጋር አለያይቷል” ሲል የአማራ ክልል ትምህርት ቢሮ አመ፤ልክቷል።
በፋኖ ምክንያት ሚሊዮኖች ያለ በደላቸው ከዕውቀት ብርሃን መከልከላቸውንና ፣ በቢሊዮን ብር የፈሰሰባቸው ትምህርት ቤቶች መፍረሳቸውን ያታወቀው ቢሮው፣ የዕልፎች ተስፋ መቀጨቱንና የዕልፎች ውድ የሆነው ዕድሜያቸ መሰረቁን አመልክቷል። “ወላጆችም ያለምንም በደላቸው እንዲሁ የድካማቸውን ፍሬ ተነፍገዋል” ሲሉ ለአዲስ ሪፖርተር የተናገሩት የክልሉ ትምህርት ቢሮ ምክትል ኃላፊ የሆኑት አቶ መኳንንት አደመ ናቸው።
“ጠመኔ ጨብጠው ዕውቀትን እንስጥ ያሉ መምህራን ተሰደዋል፣ ተገፍተዋል፣ በአፈሙዝ ማስፈራሪያ ይደርስባቸዋል” ሲሉ ኃላፊው ጠቅሰዋል። “ከማስፈራራት አልፈው ተገድለዋል፤በአስከሬናቸው ላይም የድል አድራጊነት መዝሙር ተዘምሮባቸዋል” ሲሉ እውነታ ያሉትን ይፋ አድስርገዋል።
“የክልሉን አሁናዊ የመምህራን ሁኔታ ሲያስረዱ። ተፎክሮባቸዋል ፤ ተሸልሎባቸዋል፤ መምህራንን መግደል እንደ ጀግንነት፣ ትምህርትን ማቋረጥ እንደ አርበኝነት፣ የተማሪዎችን ዕድሜ መስረቅ እንደ ትውልድ ተቆርቋሪነት ፋኖ እየተመለከተው ይገኛል ሲሉ” የፋኖ ድል ያሉትን አብራርተዋል።
ትምህርት ቤቶች ይከፈቱ ያሉ ሁሉ እንደ ባንዳ እንደሚቆጠሩና፣ እንደ አብዮት አደናቃፊ እንደሚቆጠሩ፣ “መምህራንን አትንኩ” ያሉት “ሁሉ ከእኛ ወገን አይደላችሁም” ተብለው በጠላትነት በፋኖና ደጋፊዎቹ መፈረጃቸውን ኃላፊው አስታውቀዋል።
“ከመንጋው ተለይተው ተገፍተዋል። በዱር በገደል ተሳድደዋል። የሞት መልዕክተኛ ተልኮባቸዋል። በተገኙበት ሁሉ ይገደሉ ተብሎ ትዕዛዝ ወጥቶባቸዋል። የተገኙትም ተገድለዋል። ያልተገኙትም በየቀኑ የግድያ ዛቻ ይደርስባቸዋል” ሲሉ መምህራን አሁን ላይ እያስለፉት ስላለው መራራ ሕይወት ተናግረዋል።
“ትምህርት ቤቶችን አታፍርሱ፣ ተማሪዎችን አትንኩ” ያሉትም የመከራን ቀንበር መቀበላቸውን ያነሱት ኃላፊው፣ “ልጆቻችን ይማሩ። ተስፋቸውን አትንጠቁ ያሉ ወላጆች እንደ በደለኛ ይታያሉ።ከጠላቶቻችን ወገን ናችሁ ተብለዋል ይገደላሉ” ብለዋል ኃላፊው።
መምህራን ከተማሪዎቻቸው ፊት እየታፈኑ መታገታቸውን ያወሱት የቢሮው ምክትል ኃላፊ፣ ” መምህራን ከተማሪዎቻቸው ፊት ተንበርክከው ተገርፈዋል፣ በየአደባባዩ እየዞሩ ወደ ትምህርት ቤት አንመጣም፣ ትምህርት አያስፈልግም እያላችሁ ልፈፉ ተብለዋል፤ በተከበሩበት ምድር ተቀጥተዋል፤ከክብራቸው እንዲዋረዱ ተደርገዋል ሲሉ” ቁጭት እንደሚሰማቸው አስታወቀው ተናግረዋል።
“ትምህርት ቤቶችን የዘጉ ደግሞ እንደ ታላቅ ታጋይ ይቆጠራሉ ፤ተማሪዎችን ከትምህርት ቤት ያራቁ እንደ ጀብደኛ ይታያሉ ፤መምህራንን የገደሉ ደግሞ እንደ ጦር ሜዳ ጀግና ተሞግሰዋል፣ ተወድሰዋል ይሕ ደግሞ ያልተማሩ ትውልድን እያፈራ መሆኑ ስጋት ደቅኖብናል” ሲሉ የቢሮ ኃላፊው ሰሚውን ሁሉ ግራ ስለሚያጋባው የፋኖ ትግል “ፍሬዎች” ዘርፉን አስመልክተው አስረድተዋል።
“እንደው ማን ይሙት” አሉ ኃላፊው፣ አክለውም “ትውልድን የገደለ ወይስ ትውልድን ላድን ያለ ነው ጀግና ተብሎ መሸለም የነበረበት” ሲሉ ጠየቁ፣ በዚህ አላበቁም “በዕውቀት ብርሃን ልመላልስ ያለ ነው ወይስ በዚህ ዘመን ትውልድን ወደ ጨለማ የሚነዳ ነው እንደ ጀብደኛ መታየት” ጥያቄውያቸውን አክለው “ትግሉ ምንድን ነው ሚሊዮኖችን የአቡጊዳ ጀግና ማድረግ ወይስ ተወዳዳሪ እንዳይሆኑ አድርጎ ወደኋላ መመለስ? የሚለውን ሕዝቡ በደንብ ሊረዳ የሚገባው ጉዳይ ነው” ሲሉ ማንም ልቡና ያለው ሳያቅማማ በዚህ ጉዳይ አቋም ሊይዝ እንደሚገባ ተናግረዋል።
“አሁናዊዋ ዓለም ላወቁት፣ ፊደል ለቆጠሩት እንጂ ከዕውቀት ለራቁት ቦታ የላትም” ያሉት ኃላፊው “ዓለም ለሠለጠኑት እንጂ በጨለማ ውስጥ ለሚመላለሱት አትመችም። የነጻነት ብርሃን በተባለች፣ የዕውቀት፣ የጥበብ፣ የፍልስፍና፣ የታሪክ፣ የሃይማኖት፣ የእሴት፣ የሥልጣኔ ቀንዲል በተሰኘች ሀገረ ኢትዮጵያ ከዕውቀት ጋር መጣላት፣ የዕውቀት አባቶችን መግደል ምን የሚሉት ትግል ነው? ምን የሚሉትስ ራዕይ ነው? ሀገርን በጨለማ በርኖስ መጠቅለል ወይስ ትውልድን ሳያሳውቁ መግደል?ይሕ የክልሉ ትምህርት ቢሮ ጥያቄ ነው” ብለዋል።
በአማራ ክልል በተፈጠረው ግጭት በሚሊዮን የሚቆጠሩ ተማሪዎች ከትምህርት ገበታ ርቀዋል። በሺዎች የሚቆጠሩ ትምህርት ቤቶች ተዘግተዋል። አደራችን እንወጣ ብለው ብዕር እና ጠመኔ ይዘው ወደ ትምህርት ቤት የሄዱ መምህራን ተገድለዋል። እየተገደሉ ነው። ዕውቀትን ፍለጋ ወደ ትምህርት ቤት ያቀኑ ተማሪዎችም ማን ኑ አላችሁ እየተባሉ ተገርፈዋል። ተገፍተዋል። ይህ ከአማራ ክልል በየአቅጣጫው የሚሰማ ጩኸት ነው።
በሰሜን ጎጃም ዞን መራዊ ከተማ የዕውቀት አባት መምህራን ለምን አሥተማራችሁ ተብለው መገደላቸው ይታወሳል።
“የተገደሉት መምህራን ጨዋ፣ በጣም ምሥጉን የሚባሉ፣ ሙያቸውን የሚያከብሩ፣ ተማሪ የሚወዳቸው ናቸው። ይሄ ለንግግር አይደለም። ሐቅ ነው። የተገደሉበት ምክንያት ለምን አስተማራችሁ ነው፤ ሌላ ምንም ምክንያት የላቸውም። ምንም ዓይነት የፖለቲካ ውግንናም የላቸውም፤ አንዳንዱ ከዚህም ከዛም የሚረገጥ አለ፤ እነዚህ ግን ገለልተኞች ናቸው” ሲሉ የሚያውቋቸው ምስክርነት ሰጥተው እንደነበር ይታወሳል። የቢሮው ኃላፊም ይህንኑን ደግመውታል።
“ታግቶ የተወሰደውም ለምን የማኅበረሰብ ጤና መድኀን ክፍያ አስከፈልክ ተብሎ ነው ሌላ ምክንያት የለውም” ያሉት የትምህረት ቢሮው ምክትል ኃላፊ፣ እኚሁ የቀድሞው ከንቲባም ከዓመታት በፊት ከኀላፊነታቸው የለቀቁ ። አሁን ላይ ምንም ዓይነት የፖለቲካ ተሳትፎም ኾነ ውግንና የሌላቸው ሚዛናዊ የኾኑ ሰው እንደነበሩ አስታውሰዋል።
በዞኑ አንጻራዊ ሰላም ባለባቸው አካባቢዎች ተማሪዎችን ወደ ትምህርት መመለሳቸውን በበጎ መልሉ ገልጸዋል። በርካታ ትምህርት ቤቶችም በመማር ማስተማር ሥራ ላይ መሆናቸውን አስታውቀዋል። በመራዊ ከተማ የሚገኙ ትምህርት ቤቶችም ክፍት ናቸው። አሁን ላይ የተፈጸመው ድርጊት በተማሪዎች፣ በመምህራን እና አጠቃላይ በማኅበረሰቡ ላይ አሉታዊ ተጽዕኖ ይፈጥራል ነው ያሉት። እንዲህ ዓይነት ድርጊት መወገዝ አለበትም ብለዋል።
ትምህርት ከፖለቲካ ነጻ የሆነ፣ ሕጻናትን የሚገነቡበት መድረክ እንደሆነ ያመለከቱት ኃላፊው፣ ትውልድን በሚያስቀጥል ተቋም ላይ ከፍተኛ ጫና እየደረሰ መሆኑን አመልክተዋል። አሁንም ያልተከፈቱ ትምህርት ቤቶች መኖራቸውን፣ የተከፈቱትንም ለመዝጋት የሚደረግ እንቅስቃሴ እንዳለና። በመምህራን ላይ የሚደርስ ግድያ በትውልዱ ላይ ከፍተኛ ጫና እየፈጠረ እንደሚገኝ ይህም ዞሮ ዞሮ ክልሉንና የክልሉን ተተኪዎች አብሮ የማጥፋት ታሪካዊ ግፍ መሆኑ አመልክተዋል።
“ማኅበረሰቡ ትውልድ የሚገድሉትን መቃወም አለበት፣ ከዚህ በላይ ዝም ማለት የለበትም፣ ማኅበረሰቡ እንዲፈራ፣ እንዲሸማቀቅ፣ አንገቱን እንዲደፋ ተደርጓል። ዝም ከተባለ ግን ችግሩ እያንዳንዱን የሚበላ በመኾኑ ከዚህ በላይ ዝምታ አያስፈልግም” ሲሉ ኃላፊው በግልጽ መቃወም እና “በቃችሁ” ማለት እንደሚገባ አሳስበዋል።
ሕዝብ፣ የትውልድ የቁም ሞት ያሳስበናል የሚሉ፣ ለጸጥታ ኀይሎች መረጃ በመስጠት እና የአካባቢውን ሰላም በመጠበቅ የራሳቸውን አስተዋጽኦ ማድረግ እንዳለባቸው ኃላፊው ጠቁመዋል። የጸጥታ ኀይሉ የአካባቢውን ሰላም ለማረጋገጥ እና የሕዝብን ደኅንነት ለመጠበቅ እየሠራ ያለውን ሥራ አጠናክሮ እንደሚቀጥልም አመልክተዋል።
“የታጠቁ ኀይሎች እያደረጉት ያለው ድርጊት ከወግ እና ባሕል ጋር አብሮ የማይሄድ፣ ዘላቂ ቀውስ ተክሎ የሚያልፍ፣ ማኅበራዊ መስተጋብርን የሚያናጋ፣ ከአማራ ሕዝብ ሥነ ልቦና ጋር አብሮ የማይሄድ ነው” ሲሉም ኃላፊው ነገን ማሰብ አግባብ እንደሆነ ተናግረዋል።
የተማረ ዜጋ በሌለበት የሠለጠነ ፖለቲካዊ ሃሳብ ማመንጨት፣ ማሰራጨት፣ ማስረጽ፣ አዳዲስ ቴክኖሎጂ ማፍለቅ እና በሠለጠነ ሃሳብ ላይ የሚመሠረት እንዲኾን ማድረግ አይቻልም ብለዋል።
የአማራ ብሔራዊ ክልል ምክር ቤት በቅርቡ ባካሄደው 6ኛ ዙር፣ 4ኛ ዓመት የሥራ ዘመን 9ኛ መደበኛ ጉባኤ ላይ ለአማራ ሕዝብ መብት እታገላለሁ የሚል እና በተግባር ግን ያልኾነ ኀይል ትውልዱ ድንቁርና ውስጥ እንዲነከር እና ክልሉ ከሌሎች ክልሎች ጋር ተወዳዳሪ እንዳይኾን አድርጓል ማለቱ ይታወሳል።
በሚሊዮን የሚቆጠሩ ተማሪዎች፣ በአሥር ሺዎች የሚቆጠሩ መምህራን እና የትምህርት ቤት መሪዎች ወደ ትምህርት ቤት መሄድ አልተቻላቸውም፤ ይህም በመሆኑ የአማራ ክልል የትውልድ ቅብብሎሽን የሚገታ ታላቅ ስብራት ገጥሞታል በሚል አደጋው የከፋ እንደሆነ መገለጹ አይዘነጋም።
ይህን ስብራት ለመጠገን እና ለዘመናት የሚቆይ የከፋ ጉዳት እንዳይደርስ የክልሉ ሕዝብ የጽንፈኛውን ጸረ ትምህርት አቋም በመታገል ልጆቹን ወደ ትምህርት ቤት እንዲልክ ጥሪ ማቅረቡም ይታወሳል።
ነገር ግን አሁንም የመምህራን ግድያ አልቆመም። ተማሪዎችንም ወደ ትምህርት እንዳይመጡ መከልከሉ ቀጥሏል፤ ግን አስከመቼ ነው ይህ ድርጊት የሚቀጥለው? መቋጫውስ መቼ ነው? ግቡስ ምን ይሆን? ፋኖ፣ የፋኖ ተከታዮችና ሚዲያዎቹ ማብራሪያ ሲሰጡ አይሰማም።
ፌስቡክ፡ https://web.facebook.com/addisreporternews/
ዌብሳይት፡ https://addisreporter.com/
ኢሜል፡ info@addisreporter.com
ቴሌግራም፡ https://t.me/addisreporter11
X፡ https://x.com/addisreporter
ስልክ ቁጥር፡ +251981866434 / +251116393393
